- Il èst tèrîbe tout d’min.me ! El principâl pour mi, c’èst qu’c’è-st-in walon !
L’ome s’è r’lèveut d’ès’grand fauteuy’. I v’neut d’è r’wétî l’arivéye di Lîdje-Bastogne-Lîdje dins l’bwêsse à imâdjes èyèt i d’vîseut di Flipe Gilbert. Il èst vré qui P’tit Louwis s’èsteut toudis acrotchî au vélo. Dèdjà du timps d’Edy Merckx, i d’èsteut supôrtèr. Mins rocî, avou lès quate victwêres di chûte qu’i v’neut d’nos –ofru, no cousse ènn’d-è p’leut pus. L’ome apiça ène boutâye d’eûwe. I r’wèyeut lès-imâdjes dès coûssses. El flètche brabançone tout d’abôrd. Rolà, il aveut batu Bjorn Leukemans à l’arivéye . Lès deûs coureûs s’avit ètindu à 14 kulomètes di Overiyse.
Adon, gn-a yeû l’Amstel Gold Race qu’il aveut d’djà acrotchî en 2010. Rocî, il a bén contrôlè l’coûsse djusse qu’à 15 kulomètes d’èl line en squètant Rodriguez èt Gerrans. Mins l’coureû n’a nén peû di dîre qu’i v’leut awè l’condicîyon pou s’momint-là èyèt surtout qu’il aveut stî bén-aidî pa s’n-èquipe, ostant fysiqu’mint qui moral’mint.
- Il èst modèsse savèz ! I n’ès’ prind nén pou l’mèyeû, mins pus râde pou l’pus complèt du momint !
Mins c’n-èsteut rén avou ç’qui l’ratindeut trwès djoûs pus taurd. Il a dominè l’montéye du meûr du Huy pou gâgni èl flètche walone. Pourtant, lî, i n’crwèyeut nén yèsse capâbe di rivaliser avou lès pûrs grimpeûs dins-ène montéye di pus d’douze pour cint dissus n’longueû di 900 mètes. Il èsteut d’djà dins lès preumîs au pîd du meûr. Il a controlè èyèt a seû s’disgadjî sins qui Rodrigez ènn’ seûche èr’vènu.
- C’èst seûr qui l’ome èr’conèt awè candjî s’façon d’couru ! Eyèt il a réson !
El dimègne, i d-aleut achèver ès « sinte samwêne » en rèpôrtant Lîdje-Bastogne-Lîdje. « C’èst m’mèyeûse samwêne dispus qu’dji seû profèsionèl », aveut-i lachî. Rocî, il a batu, nén pus ni mwins, qui lès deûs fréres Schleck au d’d-bout dès 255,5 kulomètes èyèt çoulà dins-in sprint à trwès.
- Quéle afêre ! Mi, dji n’d-è p’leû pus quand lès deûs fréres ont ataquè dins l’côte di La Roche aus Faucons à 20 kulomètes di l’arivéye. Dins l’côte di sint Nicolas, c’èst min.me Flipe qu’a ataquè pou squèter lès-autes.
Atincîyon savèz ! Flipe èst l’preumî Lîdjwès dispus Djosèf Bruyère gn-a 33 anéyes di d’cî èyèt l’preumî walon dispus 12 ans avou l’èr’grètè Franck Vandenbroucke a z-awè gâgnî èl walone classique.
C’èstit sès supôrtèrs qu’èstit binauje. Is-èstit rachonès dins s’vilâdje di Remoutchamps, au pîd d’èl célèbe côte d’èl Redoute.
Ah, èl Walonîye n’aveut pus conu ène bèle rèyussite èyèt ène si bèle victwêre spôrtive dispus longtimps (avou Justine azârd).
Tèrtous ècourâdjeut Flipe.Quand no walon coureû s’aveut astampè dissus sès pèdâles, lès djins criyît au pus fôrt pou vrémint l’pôrter viès l’victwêre.
Lî, i v’neut di rèyaliser in rêve d’èfant. Quand il èsteut p’tit, i rêveut di rèpôrter ès’ coûsse-là. I l’aveut gâgnî Lîdje-Bastogne-Lîdje à l’âdje di 29 ans !
El fièsse su place pouveut continuwer, rolà, au pîd d’èl Redoute. Min.me sins leû tchampîyon ! Gn-aveut min.me ène grande tente avou sès parints, ès’ famîye, sès-amis èyèt s’ « fan-club ».
Pou tous lès bons momints (èyèt on-èspère bén qu’i gn-âra co bran.mint d’s-autes), mèrcî Mossieû Flipe !
I faut r’conèche ètou qui no tchampîyon cominche à bén s’disfinde dins toutes lès-ocâsîyons, qui ça fuche au sprint, dins lès-arivéyes en côte ou bén en-èstant méreseû.
- Mi, pou m’paurt, dj’è l’vîreu bén gâgnî ène ètape du tour di France ou co bén min.me ène dèmi classique italiène di fén d’séson avou dès côtes âssèz deûre èyèt qu’on lome èl tour d’Emilie.
Mins çoulà, c’è-st-ène aute pére di mantche !