Es’côp-cî, dj’âreu p’lu vos d’vîser d’èl victwêre da Cadel Evans au tour di France, d’èl disquinde aus-infièrs du Spôrting di Châlèrwè ou co bén min.me dès transfèrts da Lukaku ou di Witsel. Non fét ! I gn-a ène saqwè qui m’trècasse ène mîyète : c’èst l’ièbe dès tèréns d’fotbale. Dji séns, vos d-alèz m’dîre qui dji pièd l’tièsse.
Eyèt pourtant …
- Est-ç’qui vos con’chèz lès p’loûses ârtificièles ?
Amon nos-autes, c’è-st-à Sint Trond, au Stayen, qui pou l’preumî côp on a djouwè ène pârtîye di preumîyère divisîyon. Ca s’passeut èl sèt du mwès d’awous’.
On dit souvint qui l’Unîyon bèlje èst dispaséye. El vént di doner l’autorisâcîyon en sètembe 2010. Eyèt pourtant, vos ‘stèz bén achîd, èl preumîyère pârtîye djouwéye en-Europe dissus in tél tèrén date di décembe 1981. C’èsteut au Queens Park Rangers.
« Qwè-ç’qui ça va candjî ? » d-alèz m’dimander.
D’abôrd dès liârds ! On pâle rocî di 500 000 Euros. D’èn-aute costè, pupont d’inondâcîyon à z-awè. El tèrén d’meur’ra tout l’timps en boun-ètat. Faut dîre qu’i gn-a d’djà bran.mint di tèrén d’entrin.mint avou in tél èr’vèt’mint.
D’après lès-èspéciâlisses, c’èst pus aujîye à djouwer là-d’ssu pou lès-èquipes à vocâcîyon tèch’nique. Mi, dji m’dimande tout d’min.me si ça n’va nén pèrturber lès djouweûs. Dji pinse tout d’in côp à l’vitèsse du balon, ètou aus r’bonds, sins roubliyî qu’on risque di disraper pus aujîy’mint. Dj’èspère qui lès crampons s’ront arindjîs pou l’nouvia tèrén.
D’après dès djouweûs dins mès con’chances, qu’ont d’djà djouwè dissus d’l-ièbe artificièle, is trouv’nut qu’c’èst pus deûr èyèt qu’on l’sint dins tous lès musques djusqu’à dins l’bas du dos. C’èst seûr qui lès-aspoyâdjes ènn’sont nén lès min.mes èt co in côp gn-a bran.mint pus di candj’mints d’rythme.
Saquantès lines dissus l’tèch’nique du tchinisse. El fameû gazon, c’èst du sâbe machî avou du vèrt caoutchouc. Coulà èst tapè dissus ène pârtîye élastique di 22 milimètes. Pa-d’zoûs, i gn-a ène coutche di lâve pou z-awè l’eûwe qui s’èva wôrs. Divant çoulà, c’èsteut dès vîs pneûs u’ont pèrdeut (on p’leut adon r’cycler 39 000 pneûs pou in méreseû tèrén d’fotbal.
Pou fini, saquants-afêres qui faut rèflèchî. Gn-a tout d’min.me du bén dins l’istwêre. Quand i djèle, i gn-a don pus dandjî d’mète ène saqwè au-d’z-eûs, ni bén seûr di d’vwêr instaler dès tîyaus pou l’ tchaufer. Cu qu’i vout dîre qu’on va fét d’s-économîyes ostant dissus l’entretîyen qui dissus l’arivâdje d’énerjîye.
Dj’é min.me lu dins-ène èr’vûwe èspéciâliséye qui l’difèrence intrè l’naturèl èyèt l’synthétique pèrmèteut d’fén deûs mîyons d’lites d’eûwe d’économîye (èyèt min.me èl doube dins lès payîs tchauds). Sins roubliyî qu’pou l’naturèl, on tapeut dès pèsticîdes à r’lâye èt rocî i gn-a pus dandjî. Min.me afêre pou l’s-engrés. On utiliseut nén lon d’ène tone èt d’mîye pa anéye. On rajoute à çoulà qu’i gn-a pus dandjî d’èl côper. El djârdini pout d-aler racrotchî sès crampons !
Pou ètèrtènu l’ièbe ârtificièle, i faut rèfoncî lès p’titès bîyes di caoutchouc èyèt ètou aroser l’tèrén …puce qu’i gn-a tout d’min.me ène saqwè qui r’chène à di l’ ièbe. Coulà fét ène wauteû di cénq cintumètes.
- Bah, qwè v’léz ! Faut évoluwer avou s’timps. Eyèt mi, c’èst çu qu’dji féns. Adon èt bén tant myeû si on pout d-ariver à n’pus d’vwêr côper ès’ pètit bouquèt d’pachî dins l’djârdin !