- Dji ratind çoulà come in tchat après n’soris, come in djîle après l’preumîyère soumonce ou co bén in mârcheû d’l-entrè Sambe èt Mouse après s’preumîyère disquètche !
C’èst trop deûr di ratinde èl cominch’mint dès coûsses à vélo dins no payîs. Qwè qui avou l’fameû Coronavirus, ça âreut p’tête p’lu ralenti lès djins. Quand vos wèyèz qu’on-a d’veut lèyî su l’costè dès-ètapes du toûr di dji n’séns pus qué payîs pace qui dès chûveûs èstît contaminés.
Amon nos-autes, i gn-a dès djon.nes come Evenepoel ou co bén Pogacar qui d’è voul’nut. Eyèt v’là n’boune ocâsîyon pou bén z-ataquer l’séson pa n’victwêre. Dès-autes bèljes sont capâbes di spiter. Vèl-cî saquants nôs à r’tènu : Theuns, Van Aert, Van Avermaet, Vanmarcke, Naesen, Bennot èyèt bén-ètindu no Filip Gilbert, co souvint aus-avants posses èt qu’a gagnî l’coûsse en 2010. Bén-ètindu, cès nôs-là, c’èst dès favoris pou lès coûsses d’in djoû principal’mint.
Djuss’tumint, èl sèm’di 29 di févrî, l’afêre comincheut du costè di Gand avou l’circwuit « het nieuwsblad ». C’èsteut l’ocâsîyon di discouvru lès-èquipes en vèrsîyon 2020 qui s’èrtrouvît dissus lès preumîs tchapias d’curè, lès preumîyèrès bôrdûres, èl bèrdoûye èyèt l’plouve. Djusse qu’asteûre, c’èsteut djusse èl toûr dès-Emirats Arâbes èyèt l’désert ou bén du costè di l’Algarve dins l’tchaleû qu’on lès-aveut vèyu.
El wékène di drouvâdje en Bèljique, c’èst co souvint in baromète pou ç’qu’i va chûre durant l’séson.
- Mi, dj’èsteu bén calè pa-d’vant m’bwêsse à imâdjes pou wétî l’afêre.
C’èst djussetumint in bèlje qu’a gagnî. Jasper Stuyven a profitè d’ène arivéye à deûs pou scrîre ès’ nô dins l’lisse dès gâgnants.
Non seûl’mint il-a fét mwés au cominch’mint d’èl coûsse, mins pa après il-a d’vu sceûre èl groupe qui s’aveut scapè dins l’meûr di Gramont. Su l’line d’arivéye, il-a pris l’mèyeû dissus Yves Lampaert.
El louvanisse di 27 ans, qu’èsteut èn-èspwêr du vélo a malaujî di rèuyssi. Min.me s’il-a stî tchampîyon du monde en 2009 èyèt qu’il-a rèpôrtè l’ Infièr du Nôrd mon lès juniôrs, il-a deûr di moustrer ès’ bia costè. Passè mon lès profèssionèls en 2015, i cache toudis après dès victwêres. Qwè qu’il-a tcheut en 2019 èt pou chûre a stî malâde.
- Pourtant, à m’n-avis, il-è-st-in spéciâlisse dès tchapias d’curè.
El lèd’mwin, dimègne, c’èsteut çu qu’on lome l’èrvindje. El coûsse qui pèrdeut l’dèpârt à Kurne pou z-è daler à Brussèles èyèt r’vènu à Kurne, d-aleut-èle co in côp doner l’victwêre à in bèlje ?
Et bén non fét ! Qwè qui Kasper Agreen apartént à l’bèlje èquipe di Deceuninck-Quick Step. C’è-st-avou Boris Vallée èyèt Ron Jans qu’il-è-stèvôye. Il-a fini pa fé saut’ler lès deûs-autes bèljes pou t’nu tièsse au p’loton. A 25 ans, i rèpôrte là ès’ quatième victwêre mon lès profèssionèls. Mins c’èst l’toute preumîyère dins-ène coûsse d’in djoû. Quand dji vos d’jeu qu’èl vélo daleut bén dins no payîs !