- Dji seû tél.mint disbautchî di vîr ène téle afêre ! Jamés au grand jamés dji n’âreu pinsè ènn’ ariver là ! Viquer çoulà dins m’vîye è-st-ène saqwè d’èwarant !
Lès spôrts, pou ène saquî di normâl, c’è-st-ène saqwè qu’i n’èst nén possîbe di s’d-è passer. Eyèt pourtant, c’èst ç’qui nos v’nons di viker durant dès samwênes ètîres ! Non fét, dès mwès ètîres.
- Quand dji pinse à çoulà, èm’ morâl d’è prind in côp ! Eyèt nén in p’tit co bén !
En plin mwès d’mârs, dès-èspéciâlisses ont v’nu nos lachî qu’in mortèl virus nos-ataqueut èt qui c’èsteut quasimint l’guère !
- Bén pour mi, ça l’èsteut ! Gn-a pont d’doutance !
Ene mwéje afêre vènûwe di Chine. On n’sént nén, èyèt on n’èl sâreut p’tête jamés, d’èyu qu’èl tchinisse a arivè. I gn-a dès céns qui dîy’nut qui çoulà s’a scapè d’un laboratwêre èyèt dès-autes qui pins’nut qui c’è-st-à cause qui lès chinwès mindj’nut dès bièsses come èl tchaude-soris ou co ène aute qui dj’é roubliyî l’nô.
- - Mi, si on m’è d’visse d’in nô en rapôrt avou lès spôrts, dji l’èrténs aujîy’mint, mins quand ça n’a rén à vîr, dj’é râde roubliyî !
Tout çoulà pou cachî di vos ‘spliquî qu’èl gouvèrnemint ès’ d-a mèlè avou in moncha di réques à chûre.
On-a cominchî pa suprimer dès tournwès di tènis èyèt pou chûre, ça a stî èl valse di tchinisses en tout genre qu’ont stî r’mètus. Lès courses à vélo èt auto, lès tchampionats di fotbale ont chû èt tous lès spôrts d’èquipes. Etou, lès spôrts di contacts.
- Pou résumé, dji n’aveu pus rén a m’èstitchî dissus l’dint !
Si Mossieu (èt Madame) Tout l’monde duvît chûre dès réques come èdmeurer à in mète cénquante èyèt pôrter dès masques, s’èrnètchî lès mwins, gn-aveut co pîre : on-a sèrè tous lès boutikes. Seûl’mint lès céns qui vindît du mindjî p’lît drouvu. Bran.mint dès djins fèyît du télé-boutâdje à leû maujo. Min.me lès scolîs ont d’vu d’meurer à leû maujo. Pou lès céns qui wèyît voltî ès’ pourmwin.ner, c’èsteut djusse à pîds ou co bén à vélo. I faut dîre ètou qui tout ‘steut sèrè : min.me nén moyén d’è daler bwêre in vêre ou di mindjî pace qui lès rèstos èyèt lès cabarèts èstît sèrès !
- Mins dins qué monde vikons-nous s’i vos plént ! Eyèt dîre qui ça pout continuwer longtimps d’après lès dèclarâcîyons dès-èspéciâlisses en tous genres.
Eureus’mint, saquantès tchin.nes dins l’bwêsse à imâdjes èrpassît dès pârtîyes dèdjà djouwéyes. C’èsteut myeû qu’rén … Mins tout d’min.me du rèstchaufè !
I gn-a bran.mint dès tchampîyonats qu’ont stî vrémint djokè. En-Al’magne, is-ont r’cominchî en mé. Mins c’èst disbautchant d’ènn’nén ètinde lès djins ècourâdjîs leû couleûrs. El vélo duvreut ètou r’prinde : lès calendrîs ont stî tchamboulès èyèt is-ont tout r’pôrtè pou l’fén d’awous’ ou cominch’mint di sètembe. Di d’cî-là, nos vîrons çu qu’ça va doner èyèt si on n’èrcominche nén co in confin’mint avou zérô spôrt !
- Ca s’reut tèrîbe !