- El dérin côp qui dj’é mètu in bîyèt, dji n’aveu wêre à dîre puce qui tous lès spôrts èstit à djoke !
C’èst l’vré qui l’corona virus nos-a èspétchî di chûre lès-èquipes ou lès djins qu’ont l’abutûde di nos fé djiper dins no fauteuy’. En sakants mwès, tout-a in pau boudjî.
Du costè dès deûs spôrts lès pus vèyus dins lès médias, çoulà s’fét d’ène façon bén candjîye. Lès-amateûs di vélo poul’nut ècouradjî leûs favorîs dissus lès tch’mwins di France, d’Italîye ou di Pologne avou leû tour rèpôrtè pa no grand-èspwêr bèlje Remco Evenepoel. En-Italîye, à Milan-San Remo, c’è-st-èn-aute djon.ne di no payîs qu’a ramassè l’preumîyère place : W. Van Aout (qu’a ètou gâgnî ène ètape du Daufinè èyèt l’tchampionat d’Bèljique du conte èl monte).
Lès grandès coûsses, èrmètûwes dins l’calendrî, ès’ sont chût rad’mint. Nén toudis aujîye à chûre, dèdjà qu’in crétérium (Daufinè) dure cénq djoûs èyèt qu’in toûr (di Lombardîye) finit en in-djoû. Mins rén ènn’ candjeut avou l’s-autès-anéyes, sinon lès gâgnants èyèt lès céns qui tchèy’nut. Pa ec.simpe, Evenepoel qu’a passè au-d’zeûs d’in p’tit meûr pou s’è r’trouver 8 mètes pus bas avou n’fractûre du bassin.
Quand au tchampionat du monde, lès swuisses ont candjî d’avis èt r’fusè d’l-organiser. Lès dècideûs cach’nut in trajèt pou l’rèplacî (Toscane ?).
Pou l’fotbale, lès coupes d’Europe ès’ sont achèvéyes en 16 djoûs. Lès-èquipes djouwant dins-in min.me payîs mins lès djins ènn’ p’lît s’rinde au stade pou ècourâdjî leû n-èquipe. Dès pârtîyes sins-ambîyance, c’èst môrt èyèt ça n’vike nén. Mins bon, c’èst myeû qu’rén di wétî çoulà dins l’bwêsse à imâdjes avou intre aute, in 8 à 2 pou l’Bayern conte èl Bârca. C’èst d’ayeûrs èl min.me afêre avou l’tchampionat d’Bèljique. Il-a cominchî èl 8 d’awous’ sins nolu dins lès gradins. Pou l’pètite istwêre,, lès preumîs èt trwèsièmes di l’anéye passéye s’èrtrouvît en-ouvèrtûre. Et c’èst Châlèrwè qu’a stî gâgnî 0-1 à Bruges. El pîre, c’èst qu’on-a wêre d’idéye djusse qu’à quand çoulà va continuwer sins spèctateû. Djusse qu’à quand l’virus s’ra èvôye ?
I faut sawè ètou qui lès djouweûs sont controlès au mwins deûs côps pa samwêne. Au momint woù dji scris, on cache à z-awè dès dérogâcîyons pou rimpli di djins (5000 avou condicîyons) dins lès stades.
Quand-aus-autes spôrts, i gn-a qui r’pèd’nut sins nolu èyèt d’s-autes qui duv’nut ratinde. C’èst l’min.me pou lès-entrin’mints.
En tènis, èl tournwè di Cincinati èyèt l’US open ès’ f’ront à New York, sins djint mins seûl’mint lès djouweûs èyèt dès-ancîyns gâgnants.
En formule yin, lès-autos toûn’nut méreseûles dissus lès circwuits, qui ça fuche à Francôrtchamps ou bén ayeûrs.
Lès spèctateûs soufrich’nut di l’afêre, mins come dins tout, i faut ratinde. Ratinde dès mèyeûsès condicîyons èt qu’èl corona 19 s’èvâye ou bén qu’on-eûche in vac.cin…avou l’èspwêr qui ça n’trin.ne nén d’trop pace qu’i gn-a pont d’rintréye di liârds èyèt i faut tout d’min.me payî (crach’mint) lès djouweûs èt dirijants. Mins çoulà, c’è-st-ène aute pére di mantche (di mayot bén-ètindu) !
èscrît èl 24 d'awousse