- Quand dji pinse qu’i-gn-a dès djins qui n’ wèy’nut nén voltî lès spôrts ! Gn- a nén a dîre, mins is-ont stî chèrvu ès’ n-anéye-ci avou èl tchampionat d’Europe di fotbale, èl toûr di France èyèt lès Djès Olympiques ! Mi, dj’é tout wétî dins l‘ bwèsse ôzès-imâdjes !
Sacrè P’tit Louwis va ! Mins ô trèfond d’ mi-minme, dji pinse come li !
Tout-a cominchî avou l’ tchampionat d’Europe an Al’magne. Çu qu’on lomeut ô cominch’mint èl coupe Henri-Delaunay, du nô du cén qu’a yeû l’idéye, a stî mètûwe an tch’mwin an 1960. Adon, èle aveut stî rèpôrtéye pa l’Union Soviètique.
Es’ n-anéye-ci, c’èst l’Espagne qui l’a gâgnî an batant l’Angletére. C’èst l’ quatième côp qu’is-ont l’ocâsîyon d’è l’awè. Pou l’ pètite istwêre, seuchèz qu’i-gn-a qu’in méreseû djouweû qui d’a djouwè chîj èyèt c’èst Christiano Ronaldo, èl portuguès. Eyèt c’èst li ètou qu’a l’èrcôrd di balons mètus dins l’ gayôle avou 14 côps.
Eyèt no payîs la-d’dins ? O, èt bén, ça n’a nén co stî l’ jwè. Du contrère minme !
Is-ont stî éliminè an wuitième di finâle, èl preumî djulèt, yin a rén pa l’èquipe di France, sins-awè wêre moustrè di bèlès-afêres. Qui ça fuche l’antrin.neû ou co bén minme quassimint tous lès djouweûs ont stî critiquè a djusse tite d’ayeûrs.
Pou chûre, èyèt minme an paralèle durant saquants djoûs, èl toûr di France s’a lancè èl 29 di jwin di Florance an-Italîye avou ène ètape di 206 kulomètes. Gn-aveut deus favoris : Tadej POGACAR èyèt Jonas VINGEGAARD. L’èslovaque a largemint dominè toute èl coûsse sins vrémint yèsse trècassî pô deuzième.
Mins in bèlje aveut n’ mîyète d’èspwêr. C’èsteut Remco EVENEPOEL qu’aveut dins l’idéye di fini dins lès 10 dèl tièsse du class’mint finâl pou s’ preumî toûr di France. Il-a fét branmint mieû puç’ qu’il-a fini trwèsième an-ataquant saquants côps. Il-a ètou gâgnî ene ètape èyèt a mètu l’ blanque casaque du mèyeû èspwêr. L’ancîyin djouweû di fotbale d’Anderlecht a vrémint yeû n’ boune idéye di chwèsi l’ vélo. I dwèt co d’vènu mèyeû dins l’ wôte montagne, mins il-èst l’èspwêr pou l’ vélo an Bèljique èyèt i poureut p’tête bén yèsse èl suc.cèsseû da Lucîyn Van impe pou rèpôrtér èl grande bouke dins lès-anéyes qui chûv’nut.
Pou chûre, nos d-arivons ôs Djès Olympiques, qui s’ passît ès’ n-anéye-ci an France.
180 spôrtifs bèljes ont cachî di montér dissus lès montéyes d’in podium. El COB aveut l’èspwêr qu’ène dîjène di mèdâyes tchérît dins l’ satch di no payîs. Nos cominch’rons pa Remco Evenepoel qui d’a yeû deûs èyèt d’ôr co bén : pou l’ cyclisme su route èyèt ètou ô conte èl monte indivuwèl mon lès-omes. Etou, Nafissatou Thiam èst tchampionne olympique pou l’ trwèsième côp an èptathlon Pou chûre, gn-a yeû six an bronze avou Wout Van Aert an vélo su route, Gabriella Willems an djudo di mwins di 70 kulos, Lotte Kopecky dins l’ vélo an line, Fabio Van den Bossche su l’omnium vélo, Sarah Chaâri an taekwondo èyèt an èptathlon, Noor Vidts.Quand a Bashir Abdi, c’èst l’ couleûr di l’ârdjint. Gn-aveut dès grands èspwêrs avou l’ wokèy dissus l’ièbe mon lès-omes, mins lès djès ès’ sont djoquès pou yeûsses après leû pârtîye conte l’Espagne !
Dins lès djès divant cès-ci, no payîs aveut rècoltè dès mèdâyes avou lès tch’vôs, mins roci, nos stîs lon èrî padrî lès-ôtes. An djimnastique, n’ mîyète trisse pou Nina Derwael qui s’ continte dèl quatième place, après-awè fièsté trwès-ans di d’vant ès’ tite olympique a Tokyo. Lès Tornados ont ratè l’ podium ètou. An baskèt, lès feumes dès bèlgians cats sont st-éliminéyes an d’ mi-finâle. Mins lès 10 mèdâyes sont la tout djusse !
Escrît èl 13 d' awousse 2024; eplaidî e rfondou dins l' Rantoele 111