- Quand dji pinse qu’i-gn-a saquantès-anéyes di d’ci, dji vos-aveu scrît èn- ârtique come qwè dji crwèyeû qui Thierry Neuville s’reut tchampîyon du monde dès ralîyes.
Et bén ès’ côp-ci, ça i èst : 2024 èsteut l’ boune anéye.
L’ome a v’nu ô monde an 1988 a Sint Vith. Il-a cominchî a couru an 2007 ô ralîye du Luc.sembour avou ène Opèl Corsa. Dins l’ tchampionat dès ralîyes, c’è-st-an 2012 qu’i comincheut ô ralîye di Catalogne dissus ène Citroen C2. Mins divant çoula, il-aveut stî tchampion du monde junior et « Intercontinental Rally Challenge » (IRC). An 2013, èl « Qatari Nasser al Attivah » fét signî in contrat a Thierry Neuville, qui mârque ès’ n-acôrd. Neuville s’èrtrouve don dins l’èquipe Qatar World Rally Team . Didins, il-a in programe complèt ô volant d’ène Ford Fiesta RS WRC.
L’anéye chûvante, Thierry Neuville cominche a fé sès preûves èyèt gagne dès spéciâlès-ètapes avou minme s’èrtrouve 7 côps dissus lès montéyes du podium.
Pou l’ séson 2014, Thierry Neuville èd’vént l’ preumî mwin.neû di l'équipe Hyundai World Rally Team, ène équipe oficièle du fameûs constructeûr coréen Hyungai qui fét s’èrtoûr an tchampionat du monde. Dèdja adon, lès-èspéciâlisses dèl discipline avît l’ doutance qu’i d’vénreut in grand coureû.
Di 2016 a 2019, i d’vént vice-tchampîyon du monde dès ralîyes. Chaque anéye, i fèyeut dès bias résultats, mins i ‘steut co n’ mîyète trop coûrt.
L’anéye 2021 va mârquér èn-ôte toûrnant di l’ cârière du mwin.neû. I s’a sèparè d’ès’ co-mwin.neu Nicolas Gilsoul. El nouvia ès’ lome Martijn Wydaeghe. Adon, l’ome a d’meurè 17 mwès sins pus rén gâgnî. Bén-eûreûs’mint, èl ralîye d’Ypres lyi a donè l’ocâsîyon d’èrtrouvér dès bounès sensâcîyons.
Es’ n-anéye-ci èsteut l’ boune. Il-a minme gâgnî deûs côps su l’ séson avou Monaco èyèt l’ Grèce. Après-awè stî vice-tchampîyon du monde dès ralîyes cénq côps an 2013, 2016, 2017, 2018 èyèt an 2019, Thierry Neuville p’leut anfin fièstér in preumî tite di tchampîyon du monde dès ralîyes.
Pou s’ preumî titre, gn-aveut dèl doutance djusse qu’ al fén dès ralîyes. Ogier èyèt Tänak dalît-is rèyussî a l’èspétchî ?
An s'ofrant l’ victwêre dissus l’ cassant Ralîye di l'Acropole an Grèce durant qui Ogier con’cheut dès trèyins tèc.niques èyèt ètou in tonia, èl mwin.neû d’amon Hyungai pèrdeut d’in mér’seû côp 34 pwints di pus qu’ès’ pus proche pourchûvant, qui r’dèv’neut adon ès’ coéquipiè d’écurîye Hyungai, Tänak. Victime d’èn-ôte ralîye coqu’mwâr ô Thili, Ogier daleut don yèsse mètu wôrs dèl coûsse èt du tite pou d’ bon, durant qui Thierry Neuville,finichant quatième, s’èployeut li, a limitér lès dègats avou l'Estonîyen, qui r’vèneut pourtant a 29 pwints.
Avou l'avant-dérène mantche, èl Ralîye d'Europe centrâle, l’ome aveut co limitè l’ câsse an pièrdant djusse 4 pwints su Tänak.
Ariveut l’ dérin ralîye, èl cén du Djapon. Il-aveut bén mô cominchît èl vèrdi pou Neuville avou dès trèyins mécaniques. C’è-st-ène sôrtîye di pisse da Ott Tänak, arivéye dissus l’ preumîyère èspéciâle du Super Sunday du fameû dérin ralîye, qu’a dècidè dèl fén du tchampîyonat. Adon, on con’cheut l’ chûte du ralîye. L'Estonîen, qui saveut qu’i n’aveut wêre di tchance di rèyussî, mais qu’î crwèyeut co toudis, a tout pièrdu après-awè stî surpris pal poussiyère qui l’a condanné a z-abandonér èt piède èl tite. Neuville ‘steut tchampîyon du monde.
Escrît èl 3 d' decimbe 2024; eplaidî e rfondou dins l' Rantoele 112