L’AIQUE EIÉT L’CHOUETTE.
Enne Aique eiét n’Chouette,
Prom’tint bin conte iun l’aute, qui n’frint pu d’leû m’wais coups,
Soét in s’trannant leû jônnes, ou in spochant leû zous,
Et pou signé l’pai qu’estèt fette,
I s’avint tous les deux, donnét n’bét’che à picette.
« Maîs, distelle ell’Chouette, conn’chéz bin més zeffants ?
— « Non, disti l’Aique, — Dabaure jai peû, distelle !
« Vô lés rincontel’rét, in bîa joû in volant,
« Et i diront dain vô gamelle !
« C’est q’vous autes roés ! dain les biesses comme les geins,
« Vô n’espaurgnét personne, ni amis, ni parints,
« Vô n’imbition rimpli vo keûre et vo cervelle !
— « Bin, disti l’Aique, fiemme leû pôrtrai ;
« Jé n’minqrai né dé n’rin leû fai.
« Achoutét, distelle, ell’Chouette :
« C’est dès amours d’effants, lès pu bia p’tits mouchons,
« Dés plumes comme enne vraî soiet, in p’tit bet’che à sarpette,
« Et deux bia z’ouyes, futèts, lugeants, et ronds !
« Leû queuwe est s’ta croqué, et leû grawes sont si tennes !
« I chante nu cô miœû q’lés Jauzennes ! »
— L’Aique trouve in jou dain l’craye d’in batîmint :
L’nid dé l’Chouette, eiét dés jônnes tout plain.
Avét n’pia sâle, comme dè l’vie trippe !
Dès môrt-poéyes su leu dos, sain z’ouyes i fieint chirippe,
Il estint laids, set’ches, et pélèts !
— « A mi l’magot, disti, in lés r’woétant d’tout prét,
« C’n’est né à brammin long, lés zeffants dé l’Chouette,
« D’aprét s’pôrtrai, c’n’est né ça leû binette ! »
— Sain rémission i l’za s’trannét !
L’Chouette ervint ! sés jônnes estint r’mèch’néts !
Elle estét presse à chaire au r’vierre !
Elle gueulét comme in déschainnét !
— On li d’sèt : « C’est s’ta vous qui faut r’prochî l’affaire :
« Sucét vô zonques ét c’est bon aployî !
« Pau portrai d’vo zeffants, l’Aique trompét, s’a brouyi,
« Pouquoé esti sî sotte, et n’voéyi né pu clére ?
« Pou dire ell’vérité, et n’né l’fai tout contrère »
Què pettée bin clapée pou lés parints soyants,
Qui n’feye nu rin q’vinté, et parlé d’leu zeffants !
I sont : bons, bias, malins, rachis, instuits, ficelles !
Et à l’zintinde, nulle pau, nia né d’pareye cervelle !
I vont sain braire à scolle, quî n’ont nè co deux ans,
Dain n’maronne à brayette, eiét n’paire dé burtelles,
I s’habie nu tout seû, il ont n’pupe ét dés gants !
Chante nu, scrive nu, q’jamai ! pâle nu comme dés oraques,
A l’foère on pourrêt bin, lés moustré dain n’barraque !
Et lés zeffants s’piéde nu, coéyant qui sont n’saquoé,
P’tits, on lès d’sèt malins ! grands, c’nest pu q’dés baudets.