L’CHAUFE SÔRI EIÉT LÉS DEUX MÂRCOTTES.
Enne chaufe sôri, estèt r’cheute sain l’savoèt,
In plein din nid d’mârcotte,
Conte les sôris, quavêt co n’dint d’travièt,
Elle sautelle rade dessus, pou li stranner s’gaviotte !
— « Commint, distelle, vôs ousèt v’ni droci,
« Aprèt s’qué vô péquée a toudi fai conte mi ?
« Quoè ? n’estez né sôri ? respondét qué j’vo frotte !
« Oyi vo l’lestèt bin ! ou jé n’su né mârcotte.
— « Quoès qué c’est ? mi sôri ? respond-elle in bréyant !
« C’est s’tin faux bru, et n’fuchèt né cruèle
« Jé sû zoéseau, woétèt mes zéles !
Et vive les geins qui vique nu in volant !
— Choutant n’raisô si jusse, l’mârcotte a sti moins rutte.
Elle l’a l’lii s’évoler tout d’chutte.
Elle escapèt pa in p’tit trau !
Deux joûs aprèt elle s’éva comme enne sotte,
Chaire dain les grawes d’enne aute mârcotte,
Q’in v’lét à mort à lés zoëzeaux,
Et cô su l’point d’iesse estrannée !
« Emme prînse pou in zoëzeau, distelle, t’es bin trompée,
« Quoé s’qui fai in mouchon ? n’est-ce né sés plumes,
« Jé sû sôri, j’in voût au chât,
« Vive les sôris et vive les râts !
« Si jai dés zéles, c’est pou n’né gagni d’rhûme.
— Pa c’moéyin là adoèt eiét nouvia,
Deux coups elle a su s’capper s’ pia.
C’faufe ci va comme in gant, pou nos hommes politiques,
Qui s’disent nû libéraux, qui s’disent nû catholiques,
Chuvant qu’il ont dangi d’iun ou bin d’laute pârtî,
Pou iesse Erprésintant et avoèt les deux vautes ;
Il ont fai ça pou iun eiét dit ça pou l’zautes ;
Dés deux costéts il ont minti.