L’MOUCHON DESQUINDU PA N’FLÉCHE.
In boyard avét s’flèche eiét n’moèche arbalette !
Avét desquindu in pierrot !
« L’mouchon bréyét in d’sant : n’est-ce né trisse eiét sot,
« C’t’avét nos zèles, qué l’flèche est fette,
« Nô vô donnons s’qui fout nô piette !
« N’vô foutét né d’nous autes, geins à keure dé bouria :
« C’est qu’enne mittant d’vô rasse sain faute.
Don’ra toudi dés ârmes à l’aute.
« Pou vô d’estrure échenne ! » c’n’est né s’qui nia d’ pu bia !
Quisqui fai les canons, l’pourre, lès balles, lés fusiques ?
C’est l’peupe toudi muss’let, et qu’on fai travayi !
Mai si r’clame trop ses doèts, ou si vout s’République,
Les ârmes qu’il a fôrgi, on les toune rade conte li.
C’est co l’peupe conte ell’peupe, quand deux Roés s’feye nu l’guerre
L’pu foire prin l’payi d’laute, et cinque milliards d’argint,
L’Roé fout rade tout dain s’potche, avet s’gouvernémint,
L’peupe qu’a pierdu paye tout ! pou s’courâche : il a l’goêre !
Et d’zimpots su s’toubaque, s’poèfe et s’sé, s’mingi, s’boére !
L’peupe gangnant n’da né pu : n’jambe dé moinse ou in bras,
I n’dé paye né moinse chère, s’bure et ses canadas !
Sain sacrifii tant d’geins, les Roés d’vrint s’batte échenne,
Au moinse payi d’leu liards, leu sottries, leu ferdennes.