L’MALETTE A DÈFAUTS.
L’bon Diœu dit en bia jou, pou li avoè s’plaigi :
— « Toutes les biesses autou d’mi, n’ont qu’a v’ni rade sachire,
« Si iun ou laute su s’pia, troufe enne saquoé à r’dire,
« I n’a qu’a s’espliqui, et j’woétrai dé l’cangi ;
« Vous, sînche vénet droci, woétet les autes é biesses,
« Comparèt vous à ieusses, estéz contint d’vo pia ?
— « Mi, disti, pouquoé né ? I m’chenne qué j’su l’pu bia,
« Jé sû doèt comme in jonc, jé sautelle, j su lesse,
« Jé grigne des dints, jé m’grawe, jé fai n’masse dé grimasses,
« Et on n’vout q’mi dain lés ducasses ;
« Sain m’queuwe, jé srét comme in Mosieû !
« Mai iun qui frét bin brére lés biesses quand on leû mousse,
« C’est m’cousin Loûrse, faûce qu’il a n’laide frimousse,
« Enne diri né qu’il a passét dain le fœu ?
— V’la Loûrse qu’arrife là d’su, on pinse bin qui va s’plinde ;
« C’est q’mi, disti, jé su l’coq dé vô binde,
« Eiét pou vo moustrer, qué j’su in râle Cocot :
« C’est qu’on za pri m’modelle, pou vo fai des pannetots !
« Mai l’pu laide biesse à m’nouye, eiét l’pu vilain woigne,
« C’est l’gros blé d’éléphant, qui s’éva comme in boigne !
« I n’a pont d’queuwe, des orayes, comme des d’vant d’gilet,
« In tuyau d’caoutchoû su s’visâche fai au r’vierre,
« Eiét in cû pu lauche qu’in dri d’gabriolet.
— « Ti, disti l’éléphant, vasè dain l’fond d’l’infierre
« Pou fai tiré t’binette, quand tu srèt co mus’lèt,
« On t’fra chimter à luche, fauce que t’és mau vélét !
« Jé n’dis né q’jé su bia, mais jé n’su né si rette,
« Qué m’matante ell Balenne qui n’a ni pids ni moins,
« Et qu’a n’pia copu rèche qué n’couviette à broquette.
— L’bon Diœu in crévant d’rire, vo l’za chéssi radmoin.
— Les biesses ess’ Couyonnint, mai les geins fieint bin pire :
Su lés défauts d’iun l’aute, i n’savint né quoé dire :
Iun c’estét in fayét, l’aute c’estét in vaurin,
In aute in pârvénu, ou bin in prope à rin !
No zappôrtons deux satches, quand nô chéyons su terre,
Pou mette nos défauts d’dain :
L’nôs, pind padri nô spalle, i no chenne toudi l’gèrre,
Mai l’zautes ont l’leû pa d’vant, i no chenne toudi plain.
Woé Joseuffe, daîn c’faufe-ci, qué c’nest qu’enne Couyonnade,
Nia n’saquoé qu’est bin vrai, et r’ténelle toudi bin :
« On voét bin in festu, dain l’ouye dé s’camarade,
« Qu’on n’voèt né in saumî dain l’sin.