L’MORT EIÉT L’FIŒU D’FAGOTS.
In vî grand pére rottêt, pou li r’gagni s’cahiutte,
Kerchi avet in fat ! c’estét in fiœu d’fagots ;
Il estét tout ployi, fauce qu’il avet mau s’dos !
A l’fin i fout là s’kèche, i s’estin d’su tout d’chutte,
Avet s’tiesse dain ses moins, tout rindu tout casset,
I songet in bréyant, tout c’qu’il avét passet !
— « Qué plaigi s’qu’il a ieu despu qu’il est su terre ?
« I travaye comme in chin, il est paufe comme in vierre !
« Souvînt i n’a pont d’poin ! S’il a bin travayi,
« Pa in ritchard sain keure, i n’sai né iesse payi !
« Eiét pou l’pau qui gangne, on li fai printe patinte,
« L’ussier est s’ta ses trousses, si n’sai né payi s’rinte ;
« Il a pârti saudard, du tins d’Napoléon,
« Et sain savoè pouquoè, il a sti s’batte bin long !
« On l’la pourchu lontain pou l’mette dain l’gârde civique.
« Il a sti obligi, dé s’fai keude enne tunique.
« S’paufe vie feûme mau sognie, estét môrte dérennemint,
« Et i n’avet pont d’liards pou payi s’n’intermint,
« Iun d’ses garçons, saudard, a sti mîs au galère,
« Pasqu’il avet d’zartet pou v’ni soulagi s’père !
« Et l’aute, malheureusemint, l’aute jou a sti tuét,
« Spochi comme enne figotte, pau gros martia d’Couyet !
« Qué moéyin d’in vudi dain in pareye dallache ?
I crie rade après l’mort, pou iesse desbarrassi !
Mai quand il l’a ieu vu, il a sti bin saisi !
— « Vo m’appélet, distelle, quoé v’léz co à vô n’âche ?
— « C’estèt pour m’donner n’moin pou merkerchi d’é m’bot,
Disti, in ossant comme enne fouye,
Et in l’woètant dain l’trau d’sés ouyes !
« Vo n’tardrèt toudi pu à m’sat’chi l’pia du dos.
Si malhûreux qu’on fuche, on vout toudi dallé,
Maugré q’tertous sû terre, nô n’estons q’des martîres !
Eiét comme el’proverbe on z’a bin raisô d’dire :
Putôt petté q’crévé.
Oyi, lés geins ont peu d’môri,
Mai i n’in sont q’pu biesse !
Pasqu’aprèt tout c’nest q’s’indôrmi,
Pou toudi !
Et s’qu’on z’a peû d’allé couchi ?
Mai c’est s’qu’on leû stiche dain leû tiesse !
Lès contes, les babiolles du curét :
« Gâre à vous autes ! vô stét dannét !
« Scôrchi, rosti, brulét !
Purgatoére ! et flammes dé l’infierre !
Des diales à coines ! r’vénants, sôrcierres !
Vî, on voét qu’on est s’tingeusét !
Mai il in d’meure toudi n’saquoè !
Bin s’qu’on z’a peû d’véni au monde ?
C’tostant naturéle dè pârti,
Et t’taussi augile qué d’véni !
Qui s’qua sti vire tout c’qu’on raconte ?
C’est pou vos liards qui fiont leû contes !
Léyet vô fôrtune au curèt :
Nia pu pont d’diale ! vô s’tét scappèt.