L’LEU EIÉT L’AGNIA.
Quand on za n’solitte pougne, et qu’on s’chiéfe bin dé l’lutte,
On za souvint raîsô ! Nol moustel’rons tout d’chutte :
In jônne bédot, d’lé n’grégne, sain s’ertourner biacoup,
Boévèt dain l’fosset l’long dé l’since ;
In leu qui crèvèt d’foin, l’woétèt sain piette patieince,
In cachant in moéyin, pou bin amanchi s’coup :
« Qui s’qui t’dit d’rescuré tes mannèts pids dain m’boère ?
Disti l’Leu, in moustrant s’machoère !
« Tauras n’roulée, t’ès bin trop franc !
— Mosieû, disti l’agnia, i faut iesse bon effant,
« I n’vô faut né iesse m’wai si rade,
« Fiet attintion m’chére camarade,
« Q’jé n’pou rin vo fai puisqué j’boés,
« Dain no fossét,
« Copu d’vingt pids ârrî d’vos broques,
« Ainsi jé n’pou né desringi,
« Vo boêre ni vo mingi !
— Tu l’desrinche, disti l’Leu, qui v’lét li foutte ess’croque !
« Nia enne an ta s’ti dire du maû d’mi tout costét !
— Ça n’sé pou né ! J’n’estèt né co vélét,
« Disti l’Bédot, bin j’prin co l’tette !
— « Si c’n’est né ti, c’est t’frére putette.
— « Bin jé n’d’ai pont, — C’est iun d’vo binde si c’est né li ?
« Vo m’mastinet tertous ! vos chins ét vo biergi,
« Nulle paure asteure jé n’pou pû m’mette à hiutte,
« Pa tout costét j’sû à l’pourchutte !
« Vos avét même consii, in chesseû d’vô voésins,
« Dé m’foute in m’wai coup dain les rains !
« On mé l’la dit, i faut bin q’jé mervinche !
— I vo l’l’apougne pa l’pia du dos,
Fout l’camp avét li dain lés bots,
Et là, i l’despiesse et i l’minche.
C’t’a s’foutte ell’ tiesse au mûr ! on voet ça tous les joûs,
Iun est pu foire qu’in aute, faut qui mousse rade ses sîches,
I s’poche les pids dés geins, i fai tous les cint coups,
On n’oûse rin dire biacoup !
I cache dispute ! in mot, rade i r’trousse ess’chimiche !
In aute ferraye tout ferre, eiét si d’vint adoét,
A l’latte, à l’lutte, baston, ou pistolet,
A n’gein paisibe, i n’cachera q’plaie et bosse,
Su vo pa et vo mame, p’tette vo sœur, comme in losse !
C’est s’t’in duèle !! radmoin
Il évoye sés témoins,
Pou d’allé su l’terrin !
I faut s’poser vo pia, pou in duèle qui cache !
Si vo n’v’lét né d’aller, on dit q’vo s’tét in lache !
On appelle ça d’l’honneûre !! si vo moustrèt vôs broques !
Insultét, vo d’allét, vo z’attrapét vo nioque
Stindu, tuét pa n’poque,
Vo l’liét padri, pou in vaurin :
Enne feume eiét d’zeffants, sain soutint, avet rin !!
N’disputte chai inte deux geins, on d’vret rade mette les bins.
Insultèt, attaquét, noèrci pa n’moèche malisse,
N’avonne né l’tribunâle, no doét, l’raiso, l’justisse ?
Quand n’saqui, comme no d’sons,
Pou s’plaigi s’fout des geins, eiét cache dés raisons,
On d’vret chaire tertous d’su, eiét à coup d’baston,
Li foutte enne bonne lesson.