L’RAT D’MOGEONNE EIÉT L’RAT D’PACHI.
In Rat d’mogeonne eiét d’euwie,
Avèt sti quai l’Rat d’pachî,
Pou v’ni sain cérémonie,
Mougni in plat d’richichî.
Su n’réche couviette à broquette,
On boutte leû platnée d’astos,
Pinsèt achîs à purette,
S’qu’il ont strannét lès deux stos !
L’dînner n’estèt né si biesse,
C’estèt à r’lèchi sés doéts !
Mai n’saqui vint brouyi l’ fiesse,
Tins q’iun mougne, eiét q’laute boés !
Astos d’l’huche dé l’chambe, pa n’craye,
V’la qu’il intinde nu du brû,
L’rat d’mogeonne pette rade à gaye,
Eièt s’camarade ell’chû.
Pu pont d’bru, i n’ont pu l’vesse,
Tout d’chutte presse à s’radayi
L’rat d’euwie dit : « Mougnons l’resse,
« Du bouli sain iesse brouyi. »
L’rat d’pâchi respond : « Bonsoère !
« Vousse véni d’moin m’vire dain m’trau ?
« Nia né tant d’mingi ni d’boère,
« Nia né d’couviette pa t’tavau,
« Mai, vi stos, rin n’mé d’esrinche,
« J’mougne tranquie, sain avoé peû,
« Merci du plaigi quand t’minche,
« Avèt l’vesse comme in galeû. »
I vaut co miœu mougni n’crousse,
A’s’n’auche, dain l’guergni, d’zous l’toèt,
Q’via, pouye, taute, boubounnes à l’lousse,
Dain n’salle, rette, biesse, èt ginnét.