VI
Acèrtinances èt an’mètances
Trwès-eûres au matén, dins leû p’tite maujone di blankès pîres su li d’zeû d’ Gobtindje, Silvin à dè mau po s’èdwârmu.
Li tchaufadje qui n’ va pus… Si feume qui dwat dins leû divan, racwètîye come on’ èfant al cache d’one miète di tchaleûr. I s’a r’lèvé po-z-aler veûy à li p’tit bokèt qu’èst dins l’ tchambe da costé. Cristèle, tote roselante, sokîye è s’ bèrce, nin lon èri d’on tchaufadje élèctrique di rawète.
Dîre qu’on-z-èsteût si bin, maugré qu’on n’aveût pont d’ caurs. Èt qu’ ça poureût s’achèver sur on nuk di fistu. On djoû, dimwin quéquefîye, lès blouws lî mètrin’ on rèvolvêr dizo s’ nez, èt l’èmin.ner po dès-ans à s’ ripinti d’awè pièrdu sès deûs bouneûrs, Fabiène èt Cristèle…
Comint ènn’ èsteût-i arivé là ? Poqwé ? Ça lî purdeûve dins s’ bas-vinte, one invîye qu’i n’aveût jamaîs soyu rasténre. Djusqu’à l’ solèver d’ têre. Adon, i s’ sinteût rapaujî d’awè sintu lès p’tits cwarps, qui n’ fyin’ pus ni sine ni mine.
Il a taurdjî po on rodje fè. I r’vèyeûve sès mwins su l’ gwadje dès crapôdes. Sès mwins què l’zeû rauyin’ leû daîrin soflèt, leûs dêrènès paroles. Il a choyu s’ tièsse, sondjaud. Li feu à r’passé au vèt’, èt pwis cor on côp au rodje. Il a tapé sès-ouys su l’ waîte-padrî ; pèrson.ne, rén su l’ vôye. Li vile dwârmeût co. Au vèt’, il a dèmaré paujêremint po-z-è raler.
Asteûre, i n’ sondjeût qu’à rac’mincî !
« C’èst l’ tchôdêre, mi p’tit poyon, ci côp ci, èlle a bin ça à sès guètes, èlle a moru po d’ bon ! » a-t-èle soflé Fabiène à mitan èdwârmoûwe.
« Faut co bin qu’ ça tchaîye di l’iviêr èt qu’i djale come jamaîs ! Pont d’ guigne ! C’èst come si dj’ vikereû dins on mète sipès d’ glace. »
Èle s’a covèriné dins l’ couviète divant s’aplaker al tchaleûr di s’-t-ome. Si keûr bateûve paujêremint. One sipite di tinrulisté à faît potchî dès gotes dins lès-ouys da Silvin.
Tron.nante di frwèd : « Dj’a sayî di uker Primo su s’ GSM, po qu’ vos riv’noche pus timpe. Pont d’ rèsponse. Todi, s’ bwèsse à mèssadje !… »
« C’èst qu’i l’aveût côpé, vos savoz bin quand on djoûwe au majong su l’ twèle… »
One coloute di minterîyes, oyi, qui s’ va tchoukî dins l’ rèsponse èt dins s’ tièsse avou dès sclats d’ sov’nances : lès loyûres qui skètenut, li bokèt d’ bwès dins l’ gawe, li cwârp qui s’ nèye dins l’aîwe.
« Dji tèlèfonerè tot coût à « R’faîtot », ça n’ pout pus taurdjî. I nos l’ faut tchandjî, è prinde one novèle. »
« Dji d’manderè dès caurs à mès parints. Ç’ côp ci, nos d’vrans bin an’mète qu’i nos-aîdenuche. Tos lès maleûrs nos tchaîyenut su l’ dos è minme timps, Ça n’ mi sbarereut nin qui l’ banque rataquereut cor on côp, télemint qui l’ trau s’alaurdji d’zo nos pîds. »
Silvin sèreûve sès pougn’, i n’ ravalereût jamaîs s’ fîrté, co mwins’ pa d’vant sès bias-parints. Passer por on pére di famile qu’i n’èst nin capabe d’aclèver si p’tite famile sins rûjes, qui n’ sét payî sès crosses : jamaîs !
I s’a rapaujî. Deûs miyons d’eûros à s’ paurtadjî. I vèyeûve lès rindjîyes dès chifes. I sinteûve l’înéye dès biyèts. Tot l’ovradje qu’il aveût d’vu fé, rèssèré dins on blouw satch di jimmastique.
Come s’il âreût yeû stî plin d’ caurs, il a passé s’ dwègt su lès lèpes di s’ « Mon Keûr » :
« Chût ! Ni d’djoz rén à vos parints. Dji sé bin qu’ nos-avans dès rûjes, mins ça va passer. Dj’a bin è l’idéye qui l’ vint va toûrner. »
« Dès rûjes ; ça dure dispoy dès mwès. On vike au rastrindu. Vosse chômadje èt m’ traîtemint sont-st-à pwin.ne su nosse compte qui l’ lèd’dimwin l’ banque s’a d’dja sièrvu po s’ payî ! Èt nos-ènn’ avans co po véngt’ cénq ans… »
Silvin l’a apicî pa sès spales po qu’i s’ trovenuche lès-ouys dins lès-ouys. Il aveût ausse dè l’ trin.ner adlé Primo, d’ lî mostrer l’ banseléye dès biyèts : on drogue què lî brûleûve si gwadje.
« Fiyoz v’ à mi, gn-a pont d’ parèy. Avou Primo, nos-avans trové dès pâjes su l’ twèle, prèsses à nos d’ner d’ l’ovradje. On d’ mande dès-èlodjeûs d’ tos lès costés, li mèstî r’prind. On-ègadje dèdja dins l’zoning dès-În.nes à Djiblou. Ni d’djoz rén à vos parints, OK ? On va ralumer li stûve à gayètes, li timps qu’ dj’ârè réglé l’afaîre ! »
« Il è-st-au diâle èto. Li bûse po lès fumêres a chûré à bokèts, c’èst bin trop risquant ? Èt adon, ça avance à qwè ? T’arindjes ça come dès gâyes sur on baston. Ci n’èst nin come ça qu’ nos-è vêrans à d’ bout ! »
« Purdoz pacyince, mi p’tit poyon, dimwin, c’èst lès-ans d’ noste èfant…Dji v’ garanti qu’i-gn-ârè pèrson.ne po nos v’ni foute li bisbrouye dins ç’ fièsse là ! Nin ç’ côp ci ! »
Fabiène s’a mètu au r’cwè dins lès brès da Silvin. Trover one rèsponse ? Li quène ? Vola deûs-ans, il avîn’ polu yeû dès caurs al banque po-z-ach’ter leû maujone, one vîye pitite cinse di blankès pîres, aband’néye. I l’avin’ ritapé. On grand djârdén, dès tchèrus, dès p’titès pîces, dès poutrèles come dins l’ timps… Di ç’ timps là, lès-èlodjeûs, c’èsteût lès rwès. Èle veût co Silvin al banque :
« Prinde one garantîye po si en cas on n’âreût pupont d’ovradje ? Vos m’avoz bin r’waîtî ? Lès-èlodjeûs controlenut vos compiutêrs, i sèrenut èt drovenut vos cofes. I tègnenut vos comptes. Èt ça n’ faît qu’ comincî ! S’on nos mèt au chômadje on djoû, c’èst qui l’ têre ni toûne pus ! »
Mins, tot toûne pus rwèd audjoûrdu ! Li bole aveût sclaté ! On sèreûve one « start-up » totes lès-eûres. Lès pourîs pèsants qu’avîn’ one boûsse al place d’on keûr, èstin’ al tchèsse aus piètes. On sèreûve adlé nos po r’drovu à Tayiwan’ Ça costeûve mwins’ tchêr vélà !
Qwè ç’ qu’il è d’moreûve asteûre : mile quate cints-eûros à payî tos lès mwès po leû maujone. Quausumint l’ mitan di ç’ qu’i gangnenut zèls deûs èchone.
Silvin a rastinu on soglot què lî monteû di s’ gwadje. On’ oradje choyeûve laîdemint sès-acèrtinances, sès-an’mètances, totes lès qualités qu’enn’avîn’ faît on bèdot !
Fini dè viker come on’ èsclâve !
On n’è causereût pus di ç’ qu’il aveût faît : oyi, asteûre pus rén qu’ po lès liârds. I n’a wêre dârmu ç’ nût là. Dès coûts bokèts avou dèl crinme di bouneûr, dès rodjes solias, dès blancs sauvions qui s’ wachotin’ dins s’ tièsse.
Co saquants djoûs, lès biyèts âront èbaumé l’ cadâve, li cwachûre si r’ssèrrè come èle s’aveût drovu.
Il ènn’aveût l’acèrtinance…
Tot r’waîtant bin à fé l’ mwins’ di brût possube, i s’aveût avancî su l’ vôye di campagne divant d’aler catchî s’-t-auto padrî one âye di spines qu’il aveût rèlî d’avance…
I v’neût tot jusse di comprinde ci qui s’ passeût. One dèmonéye pasquéye qu’aleût candjî tote si vicaîrîye ; crèver l’abcès què lî pouricheûve si tièsse.
Totes sès sofrances, tote li in.ne qu’i pwârteût dins s’ pârfond, tote si séve qu’i n’aveût jamaîs soyu maîstrî : tot aleûve potchî foû, pîre qui fwace di sès boyas.
Lès deûs-omes dèl 305 n’avin’ sièrvu qu’à disclitchî ç’ tèribe an.mètance là !
Il a ûlé à mwârt come on lè dins s’-t-auto ! I n’ sondjeûve pus aus liârds, minme s’i compteûve bin lès royu au pus rade. Il ènn’ aveût pus rén à foûte dès caurs, ci qu’i v’leûve c’èsteût : touwer, touwer !
L’auto a taurdjî dins l’ grègne d’one vîye cinse disseûléye…
One nût à fé frumjî, minme lès-âmes lès pus nwêres…