VII
Al maujo d’police
Jules Mwasse a tapé sès-ouys su lès nûléyes. I nîvereût d’vant wêre ! I gripe lès montéyes dèl maujo d’ police. Vo-l-là co di stok, cor on côp. Poqwè co m’oblidjî à yèsse di stauve po lès fièsses ?… Pace qui tos l’s-ôtes ont dès-èfants ? Pace qu’il ont mau leû panse, qu’i m’ fujenut mau causer, èt qui dj’va taper djus dins trwès mwès ?
Li mitan dès buraus èstin’ vûdes. Il a poussî l’ tchaufadje au pus fwârt dins l’ cénk. Dins l’ fond là, qwè ç’ qui dj’a co à-z-asprouver à swèssante cénq ans !
Il aleût nachî dins l’ moncia d’ papîs qu’èburtakin’ si place quand li lieût’nant Catèr « Rossète » Tossint a abroké. Èlle aveût one caume come on n’è veût wêre : rossète, qu’èlle aspouyeût co d’one coleûr pus fwate po mârquer s’ difèrince quand èle fieût sès tch’vias. One blanke pia grumîye di tatches di Djudas. Èlle èsteût bèle, nin d’ trop, mins dès grands-ouys d’on r’lavé blouw qu’on s’î âreût pièrdu sins mau.
« Dj’a soyu qu’ c’èsteût vos d’ piquèt po lès fièsses ! »
« Faut bin touwer on bèdot po fé passer l’ troupléye ! »
« C’èst qwè ç’ lîve là su l’ cwane di vosse burau : Gueûyes di Walon, vos lîjoz ça vos ? »
« Tote mi vicaîrîye dji m’a nèyî dins dès lîves qu’arin’ polu m’ doner on côp d’ mwin dins nosse mèstî : Stude dès nanches dè djins, come on dit asteûre. »
« Vos-aloz taper djus, mins todi d’ataque qwè ! On v’ dôrè l’ grâde di comissaîre li djoû qu’ vos pudroz vosse pinsion ! »
« C’è-st-a pau près ça : i faît pus malaujîy di div’nu comissaîre qui dèputé dins nosse payis ! Mins vos n’avoz nin v’nu véci po causer d’ mès cacayes, dji wadje ? »
« Non, one mwaîje afaîre…Li feume d’amon Décrampes a tèlèfoné l’ nût passéye. Leû crapôde n’a nin r’moussî après li scole, vola quate djoûs asteûre. I n’ nos-ont nin advèrtî tot d’ sûte… »
Jules s’a calé dins s’ fastrou à bascule. Lès Dècrampes, c’èst l’ fabrique à wadje, c’èst dès-acsions dins one chîléye di soces, c’èst pèsant au d’la. I dwèvenut lèver su on mwès ç’ qui dj’ gangne su deûs-ans !
« Nin todi aujîy dè sawè comint fé po l’ bin di s’-t-èfant dins cès cas là ! »
« Come vos l’ dijoz. Dècrampes è va po pwârter lès caurs qu’on l’zî d’mande po rawè l’èfant ; deûs miyons d’eûros… »
« Wouâ… »
« Po côper au pus coût… Dècrampes n’a jamaîs rabroké au tchèstia. »
« Èt l’ crapôde ? »
« Touwéye, on l’a r’trové dins one cayute adand’néye qu’aveût sièrvu po monter lès toûrnikèts d’ l’élèctrique. Li comissaîre Sèni èt l’ capitin.ne Monfwârt sont su place dispôy quatre eûres au matén. Sèni va monter one èquipe. Avou tos lès cias qu’on prins leûs condjîs, i lî faut bin dès djins tot ratindant l’ timps d’ lès ratraper ? Qwè pinsoz, ça vos-îroz ? Dji vou dîre…à trwès mwès dèl pinsion ? »
« Ni pinsoz nin à m’ place s’i vos plaît bin, lieût’nant. Si l’ comissaîre a dandjî d’ mi, dji nè l’ va nin disbèli po dès faflotes. Vos compurdoz ! »
Rossète a mètu s’ mwin su si spale…
« Dji n’é ratindeûve nin mwins’ vinant d’ vos, Jules, nos frans èquipe èchone ! Lachîz vos papîs, v’noz avou mi. L’ fabrique Mélotte s’a plindu, on lî a machuré tote si d’vantûre. I nos faut fé on constat. »
À l’uch, i nîveût à grossès flotchîyes.