XVIII
Gârde di stauve
One nût dins one maujone di police, c’èst come li longue rote d’one ètape di montagne dèl toûr di France. Ti n’èst jamaîs qwèy : wêre di momint paujêre yinte lès-èpoltadjes. Mwasse s’arindjeût po sèrer on’ ouy èt ratraper s’manque di somây quand i-gn-aveût pèrson.ne.
Maugré tot, avou ç’ qu’i lî tchèyeût su s’ dos dispôy deûs djoûs, i n’aveût nin yeû l’ocâsion d’ branmint s’èssokter. On’ uch qui grigne, li tèlèfone qui chîletéye, èl trovin’ clincî, près’ à baker di s’ tchèyêre, si minton pindant su si stoumac’, li bouche grande au laudje. Èt l’ tchokmârt dèl dispoûye dèl crapôde moussîye di blanc què l’ dispièrteût.
Mars et ça repart, a-t-i sondjî tot-z-agnant dins one bare di chôcolat. È l’ purdant, si carnet à idéyes aveût potchî foû di s’ potche.
Poqwè l’ moudreû aveût-i d’moré si lonmint avou l’ mwate ? Poqwè l’ moussî come one mariéye ? Sins monter dins one furîye adon qui l’ casète pèteût èvôye pa d’zo sès-ouys. Èst ç’ qui ça lî âreût apwârté dès-èsclamûres.
Il aveût atrapé on mau d’ tièsse di tos lès diâles. Il a avalé one aspirine dins on gourdjon d’aîwe : t’t-à l’eûre, ti n’î ariverès nin à t’ pension, waîte à tî, vî-y-ârsouye ! Bouter d’ nût, nin dwârmu. Ti vas atraper dès clôs d’ vacha !
Si mau d’ tièsse : one jate di nwêr cafeu, èt l’ mèdicamint avin’ catchî sès nwêrès-idéyes. Il a r’prind sès notes.
Téns ! Djè l’s-aveû rovî cètila ! Lès-èwarés tagueûs ! Dès chômeûs assez disloujîs po s’ rivindjî d’ssu dès-èrèniyès toles di fiêr. Â ! mon Diu, i m’ faut co rimpli m’ rapôrt ! Pus taurd… Rossète l’ârè rovyî… Di tote maniére, i-gn-a nin onk qui s’ènnè tracasse !…
I n’èsteût nin co t’t-à faît riv’nu à li, mins dès sclats ènondîn’ si tièsse à rawaîti li p’tit carnèt, èt ç’ qu’il î aveût scrît. C’èsteût sorlignî trwès côps :
Lès tagueûs sont maléns, maléns assez po r’nètî l’ flotche qu’âreût p’lu nos mète su leû rote…
I s’a sov’nu qu’il èstin’ à deûs.
Li bon côpeû d’ boûsse èt l’ mwaî qu’aveût rèfacé l’ faute avou dè cus d’ bombe di coleûr. Poqwè awè rèfacé l’ mèssadje ? Bâ ! Ça n’ diveût yèsse qui deûs-ènocints mascarâdes qu’âront v’lu mârquer leû râje.
Il a v’lu r’mète si carnèt su l’ costé, mins s’ mwin à taurdjî… Li brûlant tinkeûve si stoumac’. Nin do cafeu, nin l’ bokèt d’ Mars, Mins qwè adon ?…
Li plan po lès tagueûs d’ rèfacer on mwaî tag, è plin.ne nût ?
Li plan po lès tagueûs d’ ramasser dès bokèts d’ vêre, è plin.ne nût ?
Lès minmès fwaces qui lès cènes dèl sitron.neû ?
Bâ avou dès « si » sés’, ti mètreûs Paris è…Lès minmès fwaces à saquants kilomètes one di l’ôte !
Mwasse aveût r’plonké dins sès discomptes.
C’èsteût li Lieûtnant Sècundo Litalo qu’aveût sondjî qu’ lès tagueûs ârin’ polu yèsse à deûs po p’lu solèver l’ dispouye pusqui li stron.neû lès aveût lèyî fé.
Co todi l’ minme idéye qui mi.
I d’veûve awè one saqwè foû sqwêre. Poqwè qu’ lès tagueûs s’ont-i v’nu piède dins l’ tchamp dès-èyoliènes avou leûs lumîres sèréyes ?
Po sayî one auto ? Deûs galants po s’ bètchî ? Non.na nin à s’ vitèsse là !
On côp Dècrampes sitindu, il avin’ trové l’ magot ; do pwin dèl Sint-Ubêrt po deûs chomeûs. Ça n’ p’leût mia tchaîr. Li sin.ne si dèrôleût pa d’vant sès-ouys come s’il âreût yeû stî su place : come on film di cinéma !
Tot èsteût di sqwêre !
Li lisse avou TOTES lès djins qu’on r’çu leû yût djoûs ! Lès tagueûs sont d’dins èt lès tchaufeûs èto ! Combin d’ noms ? S’il ont corèdjî one faute, c’èst qu’i d’vin’ yèsse fén malén. Il avin’ waîtî trop près. Pus ç’ qu’i-gn-a d’ cayaus, pus ç’ qu’on trèbuke ! S’i n’ârin’ nin yeû rèfacer leû tag, èt ramasser lès bokèts d’ lumerote, dji n’âreû jamaîs faît l’ loyén yinte l’acsidint èt l’ mwârt dél crapôde.
Sins s’è rinde compte, il ont signî ç’qu’il ont faît !
One signatûre au pére dès pôces !…