XXII
Èmacraladjes
Chîj-eûres èt d’méye al vièspréye. Primo Litalo, si tièsse raspouyîye su sès deûs mwins, razouyeûve lès kilos staurés su l’ canapé. I r’pèseût lès grandès lignes di s’ plan. I studieûve li rote qu’il aveût co à fé po-z-î ariver sins rûje. I’ r’passeûve lès-arokes qu’ârin’ plu l’ vinde.
Li clé d’ l’uch d’intréye, zwèpéye adlé Silvin. Li dobe qu’il ènn’aveût faît… Li drogue po dwârmu… Lès wants d’ plastique…. Totes lès miséres qui p’lin’ trèvautchî s’ vôye. Èt qu’i faureût mète djus.
Tot èsteût au pére dès pôces. Li tchin.ne èsteût su lès dints dèl crama, prèsse po l’ovradje.
Il a couru dins l’ fond do djardén po veûy si s’ vijin, on vî djon.ne ome, aveût bachî sès stôres. Il a rèculé l’auto da Silvin, li pus près possube di l’uch.
Di l’ôte costé dèl vôye : qui dè bèton, pont d’oulote po rawaîtî, pont d’orâyes po choûter.
Di l’après prandjêre, il aveût uké Fabiène, qu’èsteût su sès grands tch’vaus, pace qui Silvin aveût chin.né foû èvôye dèl maujone sins rén lî dîre.
Primo lî aveût dit qui s’-t-ome èsteût ocupé à taper s’ linwe avou l’ cu d’one botâye di pèkèt èt qu’i r’choneûve come on ratchon à on vî tonia d’ brèssène.
Asteûre, i s’aprèsteûve à l’ ramin.ner à s’ maujone. Silvin èsteût pèsant au d’là. Il a parvinu à l’achîre al place do mwârt dins s’-t-auto. Sès wants d’ lin.ne, Contact. Èvôye dins l’ nût.
One pitite vwès s’alumeût dins s’ tièsse. Taudje, R’véns su tès pas. Waîte s’i-gn-a nin moyin d’ fé ôtrumint. Èt one ôte, pus crantchûwe. Rote, ti n’ ti vas nin lèyî rèssèrer adon qui t’ pôreûs viker à t’-y-auje, pèsant come Crésus !
L’indjoleû aleût rèyussî, ci sèreût bin rade tot. I n’ manqueût qui l’ boukèt. I n’ freût pont d’ faute. Awè one boule, mins s’è sièrvu au bon momint. Arivé al pitite cinse di blankès pîres à Gobtindje, mièrseûle su lès trîs, il a prins l’ brisé d’ dolomîye èt taurdjî pad’vant l’uch. Fabiène èl ratindeût, li diâle è s’ capotine.
« Primo ! T’as vèyu come ti mè l’ ramin.nes ! »
« Èt, twè grande sôléye, adon qui t’ feume èt t’ crapôde ti ratindenut dispôy prandjêre, ti fous è t’ panse come on pourcia, qui ti m’ faîs mau causer. »
« Laî l’ tchaîr. I n’ t’ètind pus. Il a tèté one botâye di pèkèt à li tot seû. Done mu on côp d’ mwin po l’aler taper dins s’ lét. Dji n’ vôreû nin qu’one saquî tchaîye dissus nètî come i l’ èst ! Ti n’ ratinds pèrson.ne, di ? »
« Qui vous’ qui vègne à one parèye eûre ? Raconte mî, asteûre ! »
« D’abôrd si lét, après dji t’ dîrè… »
Primo s’ sinteû pièrdu, tot d’on côp. Waîte qui dj’ pièdreû on pouy astok dès dispouyes ? Faut qu’ dji n’ rovîye rén. Avou lès tècniques dèl police d’audjoûrdu, on pîd su’ l’ costé, i l’ont rade vèyu !
Il ont stindu Silvin su s’ lét èt r’prinde alin.ne dins l’ bèle place.
T’ès fén frèch di tchôd, ti souwes à gotes… sondje à passer l’ loque à r’loqueter divant d’èraler.
« Dji… crève di swè… dji m’ pou aler sièrvu d’on « Red Bull » al cûjène ? »
« Dispêche tu, dji ratind ! »
« Tè l’as dit à one saquî qu’il aveût pèté èvôye divant prandjêre… Faureût lès-advèrtî qu’il a rabroké sins mau. »
« Ti crwès qui dj’ raconte mès mè.ins d’ famile su Face-book ? »
Primo a tapé on côp d’ouy su li stûve à gayètes. Lès briques di s’ plan s’ètassin’ come boutisses èt planerèsses : one fèle mècanique. I s’ sinteût come on pèchon dins l’aîwe quand il a rabroké dins l’ place avou deûs vêres plin à stritche.
Ti pous co laukî tot ! Ti pous co lachî tot !
A qwè bon ? S’i sorvike, c’èst twè qu’èst cût ! Di tote maniére t’as d’dja touwé on côp. Ça a passé come one lète al posse ! À paurti d’asteûre, ti conès l’ musique.
Il a stindu s’ brès èt prusinter on vêre à Fabiène.
« À nosse santé ! C’èst d’dja on fameûs gayârd ! »
Èlle a r’bouré l’ vêre.
« Ti pinses qui dj’a swè ? Dj’a putôt ausse di r’nauder. Li seûle côp qu’ dj’ a vèyu m’-n-ome arindjî come ça, c’èst l’ djoû qu’il a brulé sès culotes.
Dès gotes ont rôlé su sès massales.
« I m’ chone qu’il èst foû vôye po l’ momint, qu’i-gn-a one saqwè foû sqwêre. Qwè ç’ qui t’as dît ? »
Primo a sèré sès pougn’. I n’ saveût èwou rawaîtî. I n’ saveût èwou pwârter sès-ouys po n’ nin rèscontrer lès cis d’on cadâve à div’nu. Il a flachî :
« Il a peû qu’ t’ènn’èvôyes èri d’ lî !… »
« Ça n’a ni cu, ni tièsse. Comint ç’ qu’i pout sondjî come ça ? »
« Bin, i n’a pupont d’ovradje, il è-st-au chômadje. I n’ sét qwè fé. I dit qu’i n’ vike pus. I n’ sopwate pus d’ viker à tès côrdèles. Qui lès longuès djoûrnéyes à ratinde po rén, l’ rindenut sot. Audjoûrdu ça a stî l’ burn out. Quî ç’ qui pôreût lî è v’lu ? Ti crwès qu’ c’è-st-aujîy d’aler pwinter adlé « Pont d’ovradje ? » »
« Non, bin seûr, mins on s’ dit todi tot ! »
Primo lî a r’ssouwé one lârme avou s’ dwègt. One lârme à lî finde si keûr. Lès sècondes s’ègrin.nîn’ à n’è sawè veûy li d’bout.
« I faureût qui t’ lî causes po qu’i sopwate pus aujîyemint l’ rascrauwe à passer. »
« Mins… Mins… c’èst d’dja… » Èlle a stofé on soglot.
Primo taudje, il èst co timps !
Primo achève ti-y-ovradje !
Il a apicî l’ vêre èt l’ clincî yinte sès lèpes
« Bwè on gwardjîye. Ça îrè mia après… »
Fabiène s’a lèyî à dîre, èle bèveût s’ mwârt.
Èle s’a sinti d’naler, lèdjêre, lèdjêre…Lès paroles ènn’alin’ lon, todi pus lon. Dès mwaîjès grawes l’assatchin’ dins on pus’ sins fond.
One sitrinse bogueûve li stoumac’ da Primo. I sinteût s’ tension bouchî dins sès vwin.nes. Li pus malaujîy dimoreût à-z-achèver. Èt sins pont fé d’ faute.
Il a èfilé dès wants d’ cawoutchou, tchaussî on bobo d’ lin.ne su s’ tièsse, rilèver l’ col di s’ parka pus wôt qui s’ nez. Il a r’clôyu, l’onk après l’onk, lès stôres dèl cujène, dèl grande place, di totes lès tchambes : i rabateûve li couviète d’on vacha…
Li gruzinadje dèl pitite Cristèle, achid dins s’ pârc, lî a faît brotchî one vèssète qu’il ènn’ a tron.né come one fouye di plop !
I s’a lachî tot d’on côp, I tchûleût…
Non ! Ti n’ pous nin fé ça ! Impossube ! Rimousse à t’ maujone ! nin one èfant al fachète… Bon Diu…
I s’a dauré su l’ bâr, apicî l’ prumêre botâye qui s’ prusinteût, lamper one grande lampéye di vodka po s’ doner do coradje.
Asteûre mète lès comprimés d’ drogues po dwârmu dins l’ farmacîye. Di qwè foute, si jamaîs, lès flics su one fausse vôye.
Di sqwêre… di sqwêre… Faît come si ti t’ vôreûs fén prinde ti minme… come ça, ti n’ frès pont d’ faute…
Cristèle tchûleût à gros ikèts.
Mon Diu lès-èfants, on dîreût qu’èle li sint !
Il a r’prins on coûte gwârdjîye al botâye di Vodka, nin quèstion d’aler pus lon. I lî faleût d’morer présint à li, s’i v’leûve è profité pus taurd.
Nén on paupau… nin on gnognot…
Li plan sins pitié ripurdeût s’ rote. Arindjî lès dispouyes su leû place. Il a r’nètî lès coleûrs qui Fabiène s’è machureût s’ visadje avou do coton qu’il à laté dins on satch qui r’pudreût avou li. Pwârtez l’ cwârp è s’ lét, l’ disbiyî, lî mète si pijama. Èl veûy mièrnouwe ni l’a minme nin faît pèyî après. Quî ç’ qui tinkereût après dèl tchau a mitan rafrwèdîye ? Il a rèpèté l’ minme djeû avou Sylvin. Lès solés, li tch’mîje, li culote, li scan’çon. I lès-a mètu dins l’ choû onk di l’ôte, li brès da Silvin pa d’zo li d’zeû dèl pijama da Fabiène, divant di stinde sur zèls li linçou d’ plumes. Li mwârt aveût faît r’glatî s’ faus…
Li p’tite rèclameût s’ tètè dins sès tchuladjes. I s’a dauré d’ssu come on diâle, l’apicî, èt l’ tchèssî dins l’ fond di s’ pitite bèrce d’èfant à baraus. À lî casser s’ tièsse su s’ nounours’
« Sère ti gueûye ! Nom di Diû ! »
Ti-y-ovradje èst quausu achèvé. Ci n’èst nin l’ momint d’ piède li filé. Waîte, èlle a d’dja s’ pijama, t’as co l’ chance avou twè…Laî pichî l’ bèdot… Rote à t’-y-auje…
I panticheûve. I souweû à gotes. Èt si l’ tèlèfone sonereût ? Èt si one saquî bouchereût à l’ uch ? Èt si one saquî l’aureût vèyu moussî è l’ coû ?
I s’a r’toûrné po razouyî tote li tchambe d’on fèl côp d’ouy, po veûy si tot èsteût bin come i l’aveût sondjî. I s’a mètu al place do jendârme qui trovereût lès cwârps. N’aveût-i rén rovî ? Li cope dins leû pyjama dins leû lét. Li feume rinètîye di sès machuradjes. Lès moussemints riplôyîs su lès tchèyêres.
Lès laîds bwârléyemints !
Co cint mètes , c’èst li sprint’. Li maîsse pîce do djeû.
Li monocsîde di cârbone ! Li pwèson qui v’s-èdwat po d’ bon, sins qu’ vos l’ sintoche, sins qu’ vos l’ vèyoche. Li bètch dèl mwârt. Li grisou dès mines à tchèrbon. Dès miles, èt dès miles di mwârts tot l’s-ans. Pa famile ètîre. L’abominâbe…
Primo s’a avancî pa d’vant l’ vîye bièsse. Lès gayètes d’antracite sokyîn’ rodjasses. Li fwadje di l’infiêr s’aprèsteût à r’tchaufer s’-t-amougnî.
Primo a r’ssatchî, jusse ci qu’i faut, lès ratrapadjes èmantchîs pa Silvin. Jusse ci qu’i faleût po qu’on veûy li plâye dèl bûse. Li plâye qui spaudreût s’-t-alin.ne di mwârt dins tote li maujone. On trovereût l’andèle téle qu’èlle èsteut. Li tchôdêre qu’aveût rindu l’âme, jusse au pus mwaîs momint dès grandès djaléyes. Yèsse oblidjî di s’ rissièrvu dèl sitûve au tchèrbon maugré l’ bûse à fumêre disfwârcîye. Li ratrapadje disclapé pa l’ tchaleûr. Avou lès dwègts da Silvin et Fabiène, grumîs d’ssu… Èt co l’ mame qui boutereût po t’ chapèle…
Li pwèson rimplicheûve lès places. Al pikète do djoû, lès gâz ârin’ faît leûs-ovradjes. Tot sèreût achèvé…
Dins l’ pârfond dèl tchambe d’èfant, lès brèyadjes ridoblin’ Primo a bouchî sès-orâyes avou lès paumes di sès mwins. Padrî l’ carau dèl sitûve, on vèyeût l’ fé qu’aveût r’prind, tîjené pa l’ bûse trawèye. Li mwârt si dispêtcheût.
C’èst… C’est l’ pris à payî po qui t’ vike… Ti n’âreûs soyu fé ôtrumint !…
Sins s’astaurdjî, il a r’nètî lès vêres, lès r’mète à leû place, doner on côp d’ loque à r’loqueter. Il a r’passé dins totes lès pîces, s’ clincî on daîrin côp su lès tchûladjes di l’èfant.
Non… nin on paupau… nin on gnognot…
Moussî foû d’ là, lî a choné l’ pus malaujîy : l’idéye d’awè rovî one saqwè. Il a r’mètu pinde li clé avou lès-ôtes. Rissèrer l’uch avou s’ dobe.
C’èst pa d’zo on stwèli grumî di stwèles qu’i s’a pièrdu dins l’ nût…
On côp rabroké à s’ maujone, il a manqué d’ tchaîr flauwe di sèrâde. I brèyeût come one madelin.ne po-z-awè s’ pârdon di n’impôrte li quénk dès Bon Diu què l’ ètindreût. Li mwaîs Crustin, qui prîye quand ça l’arindje…Èt audjoûrdu, ça l’âreût bin arindjî…
Comint r’trover s’ tièsse, on djoû. Pa qwè faleût-i passer po-z-awè l’ drwèt au bouneûr. Si valîse èsteût prèsse. Il a prins l’ E421, dirècsion : nune paut !
Dimwin lès pompiers troverin’ one famile touwéye par one sitûve à tchèrbon qu’èsteût foû sqwêre. Li man, direût qu’èle lès-aveût d’dja advèrtî. Ça chonereût télemint drwèt qui l’ police ni trovereût rén à-z-î r’dîre.
Li lèd’dimin dèl Noyé, Primo aveût deûs miyons d’eûros d’èritance, trwès mwârts su s’consyince ; deûs grandès djins èt on gnognot qui n’ dimandeût qu’a viker…