XXIII
Rossète èt Mwasse al cache
Rossète èt Mwasse ont r’moussî dins l’ camionète dèl police po raler su l’ sin.ne di l’acsidint.
« Proficiat ! Mwasse, c’èsteût bin vos tûzadjes, mins n’ rovioz jamaîs qui po l’ comissaîre, lî, c’èst dès preûves qu’i vout ! »
« Wadjans n’ èchone qui nos-ènn’arans tot-z-è ralant di d’ci ? »
« Asteûre qui dj’ vos conè one miète mia, ça n’ mi s’barreût pus ! »
« Tot rôlant d’vant l’ caravane da l’Alècsandre, Mwasse s’a sov’nu di s’ passadje al maujone di police li djoû di d’vant l’ Noyé. »
« Nom di Glu ! Djè l’aveû rovî c’tila ! »
« Qwè ? »
« Oyi, i s’a v’nu plinde èt m’apwarter dès crénces qu’il aveût ramassé su l’ vôye. Dj’a laté s’ bwèsse di cârton dins l’ fond d’one drèsse dins nosse burau. Come il èst bin avou l’ mayeûr, djè lî a promètu d’ causer d’ sès miséres avou l’ comissaîre. Dins tot l’ trayin qui s’a passé dispus don, dji n’î a pus sondjî. Nos r’passerans pa d’lé lî après awè achèvé noste ovradje ! »
« Quén jenre di crénces ? »
« Dji nè l’ sé nén, dji n’ lès-a minme nin rawaîtî ! »
« Bon, nos-î èstans. Vola l’ place di l’acsidint. Rimètans nos al djoû qu’ ça s’a passé. Quand l’ labo dèl police a bouté véci, i n’ savîn’ nin co qu’ lès deûs-afaîres si t’nin’. Il ont vèyu ça come si ça n’ sèreût qu’on’ acsidint. Asteûre nos savans qui lî stron.neû èsteût là èto ! »
« Oyi, èt avou s’-t-auto qu’il a d’vu catchî èto. »
« Par là, à pawène, i-gn-a qu’ lès stindéyes di campagnes dès têres dès cinsîs. Si Dècrampes a v’nu avou sès lumerotes drovuwes, il âreût yeû d’vu veûy l’auto d’ l’ôte. Minme afaîre, à drwète, lès bonîs dès cinsîs èt lès disseûlés chantiers dès moléns à l’électrique. »
« I n’ dimore pus qu’ li p’tit bwès, vélà. »
« Waîtoz, quî ç’ qui s’amin.ne : l’ Alècsandre ! »
« Â ! Bin come ça vos froz d’one pîre deûs côps. »
« Bondjoû, Mossieû l’ comissaîre, vos v’noz po ç’ qui dj’ vos-ènn’a causé l’ôte djoû ou po l’acsidint ? Bondjoû nosse dame ! »
Rossète s’aveût rècrèsté. Tote paf, èlle aveût d’moré sins motî, mins Mwasse aveût bin vèyu qu’ ça n’ lî aleût nin d’ piède sès galons d’ lieut’nant d’ police divant lî. Il ènn’a profité po rataquer sins rastina.
« Oyi, Alècsandre. Mins vos n’ lîjoz nin lès gazètes ? »
« Ô, mî, savoz Mossieû l’ comissaîre, lès gazètîs…, tot papî s’ laî scrîre. «
« Èt l’ tévé ? »
« Po ç’ qu’on-î veût co, djè l’ âreû bin prins po mès p’tits-èfants, mins i m’ faureût satchî on ligne qui Proximus tot come Voo, mi d’mandenut d’ payî mwârt tchêr, adon ! »
Rossète, one sère trogne su s’ visadje : « Dîjoz, Mossieû l’ comissaîre, on-è r’vêreût à noste afaîre là ? »
« Oyi, madame : dijoz m’ on pau, là, Alècsandre, po l’ vosse d’ afaîre, vos n’aviz nin dit qui v’s-avîz ètindu trwès-autos li nût di d’vant vosse visite adlé nos ? »
« Djè l’ djure, mossieû l’ comissaîre. Ci nût là, dji n’ saveû m’èdwârmu. Dj’aveû mau mi stoumac’. Dj’aveû mougnî dès mosses al crinme. Èt èle ni passin’ nén. I-gn-a po crwêre qui dji d’vén vî èt qu’ mès boyas n’è volenut pus. »
Rossète ratcheûve do feu.
Mî : « Alècsandre : lès-autos ? »
« Â ! Oyi, i-gn-a one qu’a passé aviè onze eûres… Ça d’veûve yèsse on gros paujêre moteûr. Aviè méyenut, i n’a yeû one qui râneûve, on ètindeût bin qui l’ tchaufeû aveût l’ pîd pèsant dissu l’ pèdale di gâz. I-gn-a yeû on grand boum’ èt saquants munutes d’après, dj’a ètindu qu’ ça r’dèmareût. Li trwèzyinme c’èsteût come li prumêre, su l’ côp d’ one eûre èt d’méye, one eûre trwès quârt quéquefîye. Dji nè l’ sé pus, l’ martchand d’ sauvion ataqueûve mès-ouys. Après dji n’a pus rén étindu. Èt dji m’a fordwârmu djusqu’à bin taurd. »
« Bin, bin ! Èt l’ caîsse di carton qui v’ m’avoz apwârté là, èwou avoz ramassé ci qu’i-gn-a là d’dins ? »
« Tot jusse après l’ cwane do bwès, mossieû l’ comissaîre. »
« Bin, bin,… Alècsandre, asteûre dj’ènnè sé assez po fé avancî voste afaîre. Nos vwèrans ci qui l’ mayeûr pout fé. Mèrci branmint dès côps Alècsandre ! »
« Si vos-avoz co dandjî d’ mi, mossieû l’ comissaîre, dji so todi là por vos. À r’veûy, nosse dame, avou one si bèle comére qui vos po s’ î p’lu aspaler po s’-t-ovradje, i dwèt yeû bin dèl chance li comissaîre… »
Rossète s’aveût rapaujî d’on cran : « Ci sèreût bin l’èdaume d’one rèsponse. Ça n’ vout nin co dîre tchèrète, à nos d’ trover lès preûves. »
Tournéye li cwane do bwès, su l’orêre, on grande caréye nwêre trawéye sins nîve yinte lès bouchons, disgarnîs, mièrnus…
Rossète a apicî s’ gsm : « Mossieû Sèni, nos-avans do noû, i faureût qui l’ labo r’passereut su l’acsidint, èt… »