(prononçaedje eterpayis
mins, pacô, gn a on mot di rcandjî)
- Bondjoû, fijha-t i li ptit prince.
- Bondjoû, responda-t i l' ovrî ås aweyes.
- Cwè çki vos fjhoz vaici? dimanda-t i li ptit prince.
- Dji reli les voyaedjeus pa paket d' meye, derit i l' ovrî ås aweyes. Dj' evoye les trins ki ls epoirtèt, ene feye a droete, on côp a hintche.
Et on rapide plin d' loumires, groûlant come li tonire, fijha triyaner l' cahute di l' ovrî ås aweyes.
- I sont bén pressés, djha-t i li ptit prince. Après cwè çk' i cwerèt?
- Li mineu del machine n' è sét rén lu minme.
Et rouf! On deujhinme rapide plin d' loumires vora pa l' ôte costé.
- I rivnèt ddja? dimanda-t i li ptit prince!
- Ci n' est nén les minmes, fijha-t i l' ovrî ås aweyes. C' est ene discandje.
- I n' estént nén binåjhes al plaece k' il î estént?
- On n' est måy binåjhe al plaece k' on-z î est.
Et rouf, come li tonire, on troejhinme rapide plin d' loumires!
- I porshuvèt les prumîs voyaedjeus, dimanda-t i li ptit prince?
- I n' porshuvèt rén. I doirmet la dvins, oudôbén båyî. Gn a ki ls efants ki spotchèt leu narene disconte del finiesse.
- Gn a ki ls efants ki savèt bén çou k' i cachèt après, fijha-t i li ptit prince. I pierdèt leu tins po ene poupene di peces, et ele divént foirt consecante, et s' on lzi scrote, i tchoûlèt!
- Il ont del tchance, derit i l' ovrî ås aweyes.