(prononçaedje eterpayis
mins, pacô, gn a on mot di rcandjî)
C'est a ç' moumint la ki li rnåd apareta.
- Bondjoû, derit i li rnåd.
- Bondjoû, responda-t i polimint li ptit prince e s' ritournant. Mins i n' veya rén.
- Dji so vaici, derit ele li vwès, pa dzo l' melêye!
- Kî estoz? derit i li ptit prince. Vos estoz bén nozé!
- Dji so-st on rnåd.
- Vos vnoz djouwer avou mi? dimanda-t i li ptit prince. Dji so si disbåtchî!
- Dji n' såreu djouwer avou vos, dji n' so nén acmoirdou.
- Â! dji vos dmande escuze, fijha-t i li ptit prince.
Mins après avu bén tuzé, i derit:
- K' est çki ça vout dire «acmoirdou»?
- Vos n' estoz nén di d' ci, vos, derit i li rnåd. Après cwè cachîz vs?
- Dji cache après des djins. K' est çki ça vout dire «acmoirdou»?
- Les djins, derit i li rnåd, les djins ont des fiziks eyet i tchessèt. C' est foirt displaijhant! Il aclevèt des poyes eto. C' est tot çou k' i gn a d' bon dins les djins. Vos cachîz après des poyes?
- Neni, dji cache après des soçons. K' est çki ça vout dire «acmoide»?
- C'est ene sacwè k' on-z a rovyî di d' trop. Ça vout dire «fé des loyéns».
- Fé des loyéns?
- Oyi. Por mi, vos n' estoz co k' on roufion fén parey a cint meye ôtes roufions. Å dzeu do martchi, dji n' a nén dandjî d' vos. Et vos n' avoz nén dandjî d' mi nerén. Por vos, dji n' so k' on rnåd fén parey a cint meye ôtes rinåds. Mins si vos m' acmoirdoz, nos årans mezåjhe d' onk l' ôte. Por mi, i gn årè k' onk come vos tt avå l' monde. Por vos, i gn årè k' onk come mi tt avå l' monde!
- Dji cmince a comprinde, dijha-t i li ptit prince. I gn a ene fleur! Dj' a l' idêye k' ele m' a-st acmoirdou!
- Ça s' pout bén. On lzès voet totes, dissu nosse Tere!
- Ô! Ça n' est nén sol Tere.
Li rnåd esteut sbaré, shonnéve-t i:
- So ene ôte planete?
- Oyi.
- Gn a-t i des tchesseus, so cisse planete la?
- Neni.
- Vola åk d' interessant! Et des poyes?
- Neni.
- Rén n' est a l' idêye tot hute, sospira-t i li rnåd.
Mins i rivna so si idêye:
- Mi vicaedje, c' est todi l' minme rime rame. Dji tchesse les poyes, les djins m' tchessèt. Totes les poyes si ravizèt eyet totes les djins s' ravizèt. Ça fwait ki dji m' anoye on pô. Mins si vos m' acmoirdoz, ça serè come on novea solea dissu m' vicaedje. Cwand dji vs ôrè roter, ça n' serè nén come avou ls ôtes. Cwand dj' etind roter ls ôtes, dji m' muche dizo tere. Cwand dji vs etindrè roter, vos, ça m' frè moussî foû di m' tereye, come si dj' ôreu del muzike. Et pu, wai! Vos veyoz, vaila, les tchamps d' frumint? Dji n' mougne pont d' pwin. Ça fwait k' por mi, l' frumint, ça n' sieve a rén. Les tchamps d' frumint ni m' rapinsèt rén. Et ça, c' est disbåtchant! Mins vos, vos avoz des tchveas coleur di l' ôr. Ça fwait k' ça serè merviyeus, cwand vs m' åroz acmoirdou! Come li frumint a l' coleur di l' ôr, i m' frè sovni d' vos. Et dji schoûtrè voltî l' brut do vint dins les frumints!
Li rnåd s' taijha et s' riwaita-t i lontins li ptit prince:
- Si vs plait! Acmoirdoz-me! dijha-t i.
- Dji vou bén, mi, responda-t i li ptit prince, mins dji n' a waire di tins. Dj' a des camaerådes a discovri eyet mwintès afwaires a cnoxhe.
- On n' såreut cnoxhe ki les sacwès k' on-z acmoirdêye, fijha-t i li rnåd. Les djins, metans, i n' ont pus l' tins do rén cnoxhe. Il acatèt des sacwès totes fwaites å martchand. Mins come i gn a nou martchand d' camaerådes, les djins n' ont pupont d' camaerådes. Si vos voloz on camaeråde, acmoirdoz-me!
- Cwè çk' i m' fåt fé? dimanda-t i li ptit prince.
- I fåt avu bråmint del pacyince, responda-t i li rnåd. Po cmincî, vos vos ashiroz ene miete erî d' mi, insi, dins les yebes. Dji lûtchrè d' cresse di vosse costé eyet vos n' diroz rén. Avou l' lingaedje, on s' brouye co åjheymint. Mins tchaeke djoû, vos vs pôroz ashir on pô pus près!
Li ledmwin, li ptit prince rivneut.
- Vos årîz dvou rivni al minme eure, dijha-t i li rnåd. Si vos vnoz, metans, a cwatre eures di l' après nonne, dji cminçrè ddja a-z esse binåjhe aviè troes eures. Å pus l' eure avançrè-t ele, å pus k' dji m' sintirè binåjhe. A cwatre eures, dji pestelrè, dji serè so des tchôdès cindes: dj' apudrè a cnoxhe li pris do bouneur! Mins si vos vnoz tot l' minme cwand, dji n' sårè måy a kéne eure ki dji doe moussî m' cour! I fåt des rites.
- C' est cwè d' on rite? dimanda-t i li ptit prince.
- Ça eto, c'est ene sacwè k' on roveye di trop, responda-t i li rnåd. C' est çou ki fwait k' on djoû n' est nén l' minme ki ls ôtes djoûs, k' ene eure n' est nén l' minme ki ls ôtès eures. Mes tchesseus, metans, il ont on rite. Li djudi, i dansèt avou les cméres do viyaedje. Do côp, li djudi est on djoû merviyeus! Dji va porminer do costé del vegne. Si les tchesseus dansrént n' impôrte li ké djoû, tos les djoûs serént les minmes, dji n' åreu måy nou condjî.
Ça fwait ki li ptit prince acmoirda li rnåd. Et cwand fourit po nd aler:
- Â! derit i li rnåd! Dji tchoûlrè.
- C' est vos l' fåte, dji n' vos voleu pont fé d' må, mins vs avoz volou ki dji vs acmoirdaxhe!
- Oyi, ça.
- Mins vs alez braire!
- Oyi, ça, fijha-t i li rnåd.
- Mins do côp, vos n' avoz rén wangnî!
- Siya, dj' a wangnî ene sacwè, p' l' amoû del coleur des frumints. Adon, i derit co:
- Alez rvey les rôzes. Vos compudroz k' i gn a k' ene come li vosse å monde. Vos rvénroz po m' dire adiè, eyet dji vs bistocrè avou on secret.
Li ptit prince rala vey les rôzes.
- Vos n' rishonnez nén m' rôze, derit i, vormint; vos n' estoz co rén. Nolu n' vos a-st acmoirdou eyet vos n' avoz co acmoirdou nolu. Vos estoz come mi rnåd esteut. Ci n' esteut k' on rnåd parey a cint meye ôtes. Mins dj' a fwait camaeråde avou eyet asteure, i gn a k' onk come lu å monde.
Sol côp, les rôzes estént djinnêyes.
- Vos estoz beles, mins vos estoz vudes, dijha-t i. On n' såreut mori por vos. Ene djin come ene ôte ki pasreut avår ci pinsreut surmint ki m' rôze vos ravize. Mins a leye tote seule, ele conte di pus k' vozôtes tertotes, puski c' est leye ki dj' a raiwé. Puski c' est leye ki dj' a bouté pa dzo s' bole di veule. Puski c' est leye ki dj' a metou å rcwè dzo s' toetea. Puski c' est leye ki dj' a touwé ses halenes (a pårt deus troes po dire d' avu des påvions). Puski c' est leye ki dj' a schoûté k' ele si plindeut, ou k' ele fijheut del rinflêye, ou minme, pa des côps, k' ele si taijheut. Puski c' est m' rôze da minne.
Et i rivna dlé li rnåd.
- Adiu, djha-t i!
- Adiu, djha-t i li rnåd. Vochal mi secret. Il est foirt simpe: on n' voet bén k' avou s' cour. Çou ki conte po do bon, on nel sét vey avou ses ouys.
- Çou ki conte po do bon, on nel sét vey avou ses ouys, repeta-t i li ptit prince po s' sovni.
- C' est l' tins k' vos avoz pierdou po vosse rôze ki fwait k' ele conte tant por vos.
- C' est l' tins k' dj' a pierdou po m' rôze! fijha-t i li ptit prince, afiss di s' sovni.
- Les djins ont rovyî cisse vraiye la. Mins vos, vos nel divoz nén rovyî. Vos divnoz responsåbe po tofer di çou k' vos avoz acmoirdou. Vos estoz responsåbe di vosse rôze!
- Dji so responsåbe di m' rôze! repeta-t i li ptit prince por lu s' sovni.