I m’ fala lontins po comprinde d’ eyu çk’ i vneut. Li ptit prince mi dmandéve toplin ds afwaires mins, aparanmint, i n’ etindeut måy çou ki dji lyi dmandéve, mi. C’ est avou sacwants mots, dits a l’ astcheyance, ki dj’ a comprins ttafwait, pitchote a midjote. Insi, cwand il aviza mi-y avion pol prumire feye (dji n’ dessinrè nin mi avion, ça sereut bråmint trop målåjhey por mi), i m’ dimanda:
- K’ est çki c’ est d’ ça po ene sacwè ?
- Ça n’ est nén ene sacwè. Çoula vole. C’ est èn avion. C’ est mi-y avion.
Eyet dj’ esteu fir di lyi dire ki dji voléve. Adon, i derit:
- Kimint ! Vos avoz toumé djus do cir, dabôrd ?
- Oyi, deri dju, tot sayant di n’ nén fé do rinflé.
- A ! Vola yåk di drole !
Eyet li ptit prince riya djoleymint, ki dj’ end esteu tot måvlé. Dj’ inme ostant k’ on n’ reye nén d’ mes rascråwes. Adon, i derit co:
- Ça fwait ki vos eto, vos adchindoz do cir ! Di kéne planete estoz ?
Sol côp, dji veya come ene pitite aireur, e mistere do Ptit Prince. Dji lyi dmanda platezak:
- Ça fwait k’ vos vnoz d’ ene ôte planete, paret ?
Mins i n’ responda nén. Si tiesse hossive doûçmint, eyet i rwaitive mi-y avion:
- C’ est l’ vraiy k’ avou on fayé cayet insi, vos n’ sårîz vni did foirt lon !
Eyet i s’ meta a sondjî ey a sondjî, lontins. Adon, i saetcha m’ bedot foû di s’ taxhe eyet i rawaita eyet ravizer s’ trezôr.
Vos sintoz bén come çoula m’ grabouyive, les sounetes k’ i vneut do taper ådfwait des «ôtès planetes». Ça fwait k’ dji waita do comprinde on pô mî :
- Did wice vinoz, mi ptit boket ? Wice est i, vosse lodjisse ? Eyu çki vos l’ contez emoenner, vosse bedot ?
I dmora on tins sins moti, a tuziner. Adon, i responda:
- Çou k’ i gn a d’ bén, avou l’ boesse ki vos m’ avoz bayî, c’ est k’ ça lyi sievrè di måjhon po del nute.
- Oyi ça ! Et si vs estoz vayant, dji vs dinrè ene coide eto, po l’ ateler del djournêye. Eyet co on piket.
Mins la, li ptit prince ava l’ air tchoké:
- L’ ateler ? Kéne drole d’ idêye !
- Mins si vos n’ l’ atelez nin, il irè tocosté eyet i s’ piedrè !
Mi camaeråde si tapa-st a djiper, eco on côp:
- Mins eyu vôrîz k’ il ireut ?
- Bén, tot l’ minme ewou. Tot droet !
Adon, li ptit prince derit, tot serieus:
- Ça n’ fwait rén. Mi lodjisse est si télmint ptit !
Et, ene miete disbåtchî, motoit, i djha co:
- Tot ndalant tot droet, on n’ såreut aler foirt lon !
Hårdêye difoûtrinne