Ça fwait ki dj’ aveu-st aprins ene sacwè d’ ôte di foirt consecant: li planete k’ il è vneut esteut a poenne pus grande k’ ene måjhon !
Gn aveut nin a m’ sibarer d’ trop. Dji saveu bén k’ a costé des grossès boles come li Tere, Djupiter, Måss, Venusse - totès planetes k’ on lzî a dné des nos - i gn a des cints d’ ôtes ki sont pa des côps télmint tchotes k’ on-z a des rujhes po les vey, minme avou on telescope. Cwand c’ est k’ èn astronome è discouve ene, i l’ batijhe d’ on limero. Metans k’ i l’ lome «l’ asteroyide trinte-deus céncwante-ey-onk».
Dji pinse bén ki li planete do Ptit Prince, c’ est l’ asteroyide B shî cint et doze. C’ est èn asteroyide ki n’ a stî veyou k’ on côp å telescope, e dijh-nouv cint et doze, pa èn astronome trouk.
A ç’ moumint la, il aveut stî djåzer di l’ asteroyide k’ il aveut discovrou dins on grand Congrès Eternåcionå d’ Astronomeye. Mins gn a nouk ki l’ aveut creyou ! C’ esteut ses mousmints les cåzes !
Les grandès djins sont come ça.
Lacobén po li rlomêye di l’ asteroyide B shî cint et doze, on dictateur trouk a-st oblidjî les djins a s’ boter come les Uropeyins. Les cis ki n’ choûtént nén estént metous a moirt. L’ an dijh-nouv cint et vint, l’ astronome a ristî spliker cwè et come, avou si asteroyide. Il esteut bén prôpe sor lu eyet, po ç’ côp la, tot l’ monde a stî dacoird avou lu.
Si dji vs raconte totes ces afwaires la so l’ asteroyide B shî cint et doze, eyet si dji vs a dit si limero, c’ est les grandès djins les cåzes. Les grands inmèt bén les chifes. Si vos lzî dvizez d’ on novea camaeråde, i n’ vos dmandèt måy çou ki conte po do bon. I n’ vos dmandèt måy: «Kimint çki s’ vwès soune ? A cwè çk’ il inme li mî djouwer ? Tint i les palivoles ?» Neni: i vos dmandèt: «Kéne âdje a-t i ? Kibin d’ frés a-t i ? Kibin peze-t i ? Kibin s’ pa wangne-t i ?» C’ est seulmint adon k’ elle ont l’ idêye k’ ele li cnoxhèt. Si vos djhoz åzès grandès djins: «Dj’ a veyou ene bele måjhon avou des rôzès brikes, des djeranioms après les finiesses eyet des blancs colons sol toet», ele ni parvinèt nén a mådjiner cisse måjhon. I lzî fåt dire: «Dj’ a veyou ene måjhon di cint meye francs.» A ç’ moumint la, elle e vont: «Come c’ est djoli !»
Metans k’ vos lzî djhoz: «Les prouves ki li Ptit Prince egzistêye po do bon, c’ est k’ il esteut tchårné, k’ i djipéve eyet k’ i voleut on bedot. Cwand on vout on bedot, c’ est les prouves k’ on-z egzistêye», les grandès djins håssèt leus spales eyet dire ki vos estoz efant ! Mins si vos lzî djhoz: «Li planete k’ i provneut, c’ est l’ asteroyide B shî cint et doze», adon, les grands s’ lairont adire eyet vos leyî e påye avou leus kesses et leus messes. I sont-st insi. Pont d’ avance di s’ måvler après zels. Les efants dvèt esse foirt coulants avou les grandès djins.
Mins nozôtes, come di djusse, nozôtes ki comprind bén çou ki viker vout dire, nos nd avans d’ keure, des limeros ! Dj’ åro bén yeu volou adrovi mi istwere a môde di conte. Dj’ åreu yeu volou dire: «I gn aveut on côp on Ptit Prince ki dmoréve so ene planete a hipe pus grande ki lu, eyet k’ aveut dandjî d’ on camaeråde». Dji so si disbåtchî, tot contant ces sovnances la. I gn a ddja shijh ans di çoula, ki m’ camaeråde end a ndalé avou s’ bedot. Si dji waite del discrire, vaici, c’ est po nel nén rovyî. C’ est disbåtchant, do rovyî on camaeråde. Tot l’ monde n’ a nén-st avou on camaeråde. Et dji pôreu divni come les grandès djins, ki n’ ont pupont d’ agrè, a pårt po les chifes. C’ est ça ki dj’ a-st atchté ene boesse di coleurs eyet des croyons. C’ est deur, a mi ådje, di s’ rimete a dessiner, cwand on n’ a djamåy rén assayî d’ ôte k’ on bowa cloyou ey on bowa å lådje, k’ on-z aveut shijh ans ! Dji sayrè, come di djusse, di fé des portraits les pus rshonnants possibe. Mins dji n’ so nén seur d’ adiercî m’ côp. Ene imådje, ça va, ey adon, l’ imådje d’ après n’ est pus rshonnante assez.
Dji m’ brouye on pô ossu avou l’ grandeur. Cial, li Ptit Prince est trop grand. La, il est trop ptit. Dji balzene eto pol coleur di si-y abiymint. Ça fwait ki dj’ î va come djel sin, don ci, don la, et come dji pou. Po fini, dji m’ brouyrè po des pus consecantès afwaires. Mins çoula, i mel fårè pardoner. C’ est ki m’ camaeråde n’ esplikéve måy rén. Télfeye pinséve-t i ki dj’ esteu on parey a lu. Mins mi, målureuzmint, dji n’ sai vey les bedots åd truviè des boesses. Motoit so dju divnou on pô come les grandès djins. Dj’ a dvou divni vî.
Hårdêye difoûtrinne