Tos les djoûs, dj’ apurdeu ene sacwè d’ noû sol planete, sol djoû ki li Ptit Prince end aveut ndalé, so s’ voyadje. Ça vneut tot doûçmint, plicplok, avou les tuzaedjes. C’ est l’ troejhinme djoû ki dj’ etinda cåzer do drame des bawobapes.
Ci fourit co l’ bedot les cåzes ca, a on moumint, li Ptit Prince mi dmanda yåk, come onk k’ est so dotance, tot d’ on côp :
- C’ est al boune, douwê, ki les bedots mindjèt les bouxhons ?
- Oyi, c’ est al boune.
- A ! derit i. Dji so bén binåjhe.
Dji n’ compurdeu nén douvént çk’ i faleut ki les bedots mougnénxhe les bouxhons. Mins li Ptit Prince derit co:
- Ça fwait, si dji comprind bén, k’ i mindjèt les bawobapes eto ?
Dji fjha rmarker å Ptit Prince ki les bawobapes ni sont nén des bouxhons, mins des åbes grands come des eglijhes. Il epoitreut co avou lu tot on tropea d’ olifants ki les olifants n’ avénrént nén a coron d’ on seu bawobape.
L’ idêye d’ on tropea d’ olifants fijha xhaxhler li Ptit Prince:
- I les fåreut ramonçler so onk l’ ôte.
Mins i derit eto, come on sûti ptit valet k’ il esteut:
- Les bawobapes, divant do crexhe, ça est ptit po cmincî.
- C’ est djusse ! Mins douvént voloz vs ki vos bedots mougnexhe les ptits bawobapes ?
I responda: «Bén ! Cisse-lale ! Vos mel copeyroz !» come s’ i gn åreut rén d’ drole ladvins. Et dji dva fé ovrer m’ compurdixheure comifåt por mi comprinde tot seu li rujhe k’ i gn aveut ladvins.
Sol planete do Ptit Prince, come d’ efet, come so totes les planetes, i gn aveut deus sôres di yebes: les bounes eyet les crouwås. Do côp, i gn aveut ossu des bounès grinnes po les bounès yebes, eyet des mwaijhès grinnes po les crouwås. Mins les grinnes, on n’ les voet nén. Ele doirmèt catcheymint, e schô del tere, disk’ a tant k’ ene di zeles a l’ zine do s’ dispierter ! Adon, ele si stind eyet, tote timide, ele boute après l’ solea ene nozêye pitite brokete ki n’ fwait nou toirt a nolu. Si c’ est ene brokete di rådisse ou di rôze, on l’ pout bén leyî crexhe a s’ môde. Mins si c’ est ene måle plante, i l’ fåt råyî do côp k’ on l’ a savu ricnoxhe. Et djustumint, i gn aveut des teribès grinnes, dissu l’ planete då Ptit Prince !
C’ esteut des grinnes di bawobapes. I gn avot tot griblé, dins l’ tere del planete. Et on bawobape, si on tådje di trop, on n’ s’ è sait pus måy fé cwite. Il ehale tote li bole. I l’ trawe avou ses raecenes. Si l’ bole est pår trop tchote, eyet s’ i gn a trop di bawobapes, i l’ fijhèt peter.
«C’ est ene kession d’ dicipline», m’ a-t i dit li Ptit Prince, pus tård. «Cwand on s’ a tot lavé, å matén, i fåt rnetyî s’ planete a môde di djin. I s’ fåt oblidjî a råyî les bawobapes a tins a eure, si roed k’ on les sait ricnoxhe foû des rôzîs, ca ces deus plantes la si ravizèt foirt, dins les prumîs tins. C’ est soyant, come ovraedje, mins c’ est åjhey.»
Et on bea djoû, i m’ consia do waitî do fé ene bele imådje, po bén herer çoula el tiesse dås efants di m’ payis. «S’ i voyaedjèt on djoû», endaléve-t i li Ptit Prince, «ça ls ahesrè kéke feye. Des côps k’ i gn a, ça n’ fwait rén si on rmet l’ ovraedje a pus tård. Mins avou des bawobapes, c’ est tos djeus po-z aveur on måleur. Dj’ a cnoxhou ene planete insi, ki c’ esteut on nawe k’ î dmoréve. Il aveut leyî crexhe troes bouxhons so cisse bole la. Dji n’ fwai nén voltî do moralisse. Mins c’ est si dandjreus, les bawobapes, c’ est si riscant, pol ci ki s’ piedreut so èn asteroyide, ki, po ene feye, dji n’ mi va pus ritni: «Mes efants, waitîz bén a vos, avou les bawobapes !» C’ est po-z advierti mes camaerådes conte on dandjî ki nos manceye, zels come mi, dispoy si lontins, sins ki nos n’ ns è rindanxhe conte, ki dj’ a tant bouté sol dessén droci. Ça valeut les poennes do dner cisse luçon ci. Vos vos dmandroz motoit: douvint, dins ç’ live ci, gn a-t i pont d’ ôte imådje si grandissime ki l’ cene des bawobapes ? Dj’ a-st åjhey po responde: dj’ a sayî, mins dji n’ î a nén parvinou. Cwand dj’ a fwait l’ imådje avou les bawobapes, dj’ esteu-st enondé pask’ i fjheut strapant.
Hårdêye difoûtrinne