Tos les djoûs, dj' apurdeu ene sacwè d' noû sol planete, sol djoû ki li ptit prince end aveut nd alé, so s' voyaedje. Ça vneut tot doûçmint, plic ploc, avou les tuzaedjes. C' est l' troejhinme djoû ki dj' etinda cåzer do drame des baobabs.
Ci fourit co l' bedot les cåzes ca, a on moumint, li ptit prince mi dmanda åk, come onk k' est so dotance, tot d' on côp :
- C' est al boune, dwai, ki les bedots mindjèt les bouxhons?
- Oyi, c' est al boune.
- Â! derit i. Dji so bén binåjhe.
Dji n' compurdeu nén douvént çk' i faleut ki les bedots mougnénxhe les bouxhons. Mins li ptit prince derit co:
- Ça fwait, si dji comprind bén, k' i mindjèt les baobabs eto?
Dji fjha rmarker å ptit prince ki les baobabs ni sont nén des bouxhons, mins des åbes grands come des eglijhes. Il epoitreut co avou lu tot on tropea d' elefants ki les elefants n' avénrént nén a coron d' on seul baobab.
L' idêye d' on tropea d' elefants fjha haxhler li ptit prince:
- I les fåreut ramonçler so onk l' ôte.
Mins i derit eto, come on sûti ptit valet k' il esteut:
- Les baobabs, divant do crexhe, ça est ptit po cmincî.
- C' est djusse! Mins douvént voloz vs ki vos bedots mougnexhe les ptits baobabs?
I responda: «Bén! Cisse lale! Vos mel copeyroz!» come i gn åreut rén d' drole la dvins. Et dji dva fé ovrer m' compurdixheure comifåt por mi comprinde tot seu l' rujhe k' i gn aveut la dvins.
Sol planete do ptit prince, an efet, come so totes les planetes, i gn aveut deus sôres di yebes: les bounes eyet les cruwôs. Do côp, i gn aveut ossu des bounès grinnes po les bounès yebes, eyet des mwaijhès grinnes po les cruwôs. Mins les grinnes, on n' les voet nén. Ele doirmèt catchimint, e schô del tere, djusk' a tant k' ene di zeles a l' zine do s' dispierter! Adon, ele si stind eyet, tote timide, ele boute après l' solea ene nozêye pitite brokete ki n' fwait nou toirt a nolu. Si c' est ene brokete di radisse ou di rôze, on l' pout bén leyî crexhe a s' môde. Mins si c' est ene måle plante, i l' fåt råyî do côp k' on l' a savu ricnoxhe. Et djustumint, i gn aveut des teribès grinnes, dissu l' planete då ptit prince!
C' esteut des grinnes di baobabs. I gn aveut tot griblé, dins l' tere del planete. Et on baobab, si on tådje di trop, on n' s' e sét pus måy fé cwite. Il ehale tote li bole. I l' trawe avou ses raecenes. Si l' bole est pår trop tchote, eyet s' i gn a trop di baobabs, i l' fijhèt peter.
«C' est ene kession di dissipline», m' a-t i dit li ptit prince, pus tård. «Cwand on s' a tot lavé, å matén, i fåt rnetyî s' planete a môde di djin. I s' fåt oblidjî a råyî les baobabs a tins a eure, si roed k' on les sét ricnoxhe foû des rôzîs, ca ces deus plantes la si ravizèt foirt, dins les prumîs tins. C' est soyant, come ovraedje, mins c' est åjhey.»
Et on bea djoû, i m' consia do waitî do fé ene bele imådje, po bén herer çoula el tiesse dås efants di m' payis. «S' i voyaedjèt on djoû», end aléve-t i li ptit prince, «ça ls ahesrè kéke feye. Des côps k' i gn a, ça n' fwait rén si on rmet l' ovraedje a pus tård. Mins avou des baobabs, c' est tos djeus po-z avu on måleur. Dj' a cnoxhou ene planete insi, ki c' esteut on nawe k' î dmoréve. Il aveut leyî crexhe troes bouxhons cisse bole la. Dji n' fwai nén voltî do moralisse. Mins c' est si dandjureus, les baobabs, c' est si riscant, pol ci ki s' piedreut so èn astéroyide, ki, po ene feye, dji n' mi va pus ritni: «Mes efants, waitîz bén a vos, avou les baobabs!» C' est po-z advierti mes camaerådes conte on dandjî ki nos manceye, zels come mi, dispoy si lontins, sins ki nos ns e rindanxhe conte, ki dj' a tant bouté sol dessin droci. Ça valeut les poennes do dner cisse leçon ci. Vos vos dmandroz motoit: Douvént, dins ç' live ci, gn a-t i pont d' ôte imådje si grandissime ki l' cene des baobabs? Dj' a åjhey po responde: dj' a sayî, mins dji n' î a nén parvinou. Cwand dj' a fwait l' imådje avou les baobabs, dj' esteu enondé pask' i fjheut strapant.
Hårdêye difoûtrinne