Â! mi ptit prince, dj' a compris, pô a pô, come vosse pitit vicaedje esteut tot plin d' penin. Lontins, vos n' avoz avu, come pasmint d' tins, ki l' doûceur des coûtchîs d' solea. C' est ene sacwè ki dj' a savu li cwatrinme djoû, å matén, cwand vos m' avoz dit:
- Dj' inme bén do rwaitî l' solea ki s' lait djus. Alans vey li solea ki s' coûtche!
- Bè, i fåt ratinde!
- Ratinde après cwè?
- Ratinde après l' eure ki l' solea s' lait djus.
Po cmincî, vos avoz-st avou l' air tot peté. Adon, vos avoz ri d' vos minme.
- Dji m' pinse todi so m' planete! m' avoz vs dit.
Come d' efet. Cwand il est doze eures ås Etats Unis, li solea s' coûtche sol France, come tot l' monde el sét bén. I gn åreut k' a savu aler el France so ene munute di tins po savu rloukî l' solea ki s' lait djus. Målureuzmint, li France est pår trop lon erî. Mins so vosse pitite bole, vos n' avîz k' a saetchî vosse tcheyire troes asdjamblêyes pus lon. Et vos rwaitîz l' anuti tot côp k' vos péyîz après!
- On djoû, dj' a veyou l' solea aler djus cwarante troes feyes!
Ene miete après, vos djhîz co:
- Cwand c' est k' on-z est tot disbåtchî, sav'! on rwaite voltî l' solea ki s' lait djus!
- Li djoû des cwarante troes côps, vos estîz si disbåtchî k' çoula?
Mins li ptit prince ni responda nén.
Hårdêye difoûtrinne