A ! mi Ptit Prince, dj’ a comprins, pitchote a midjote, come vosse pitit vicaedje esteut toplin d’ penin. Lontins, vos n’ avoz-st avou, come pasmint d’ tins, ki l’ doûceur des coûtchîs d’ solea. C’ est ene sacwè ki dj’ a savou li cwatrinme djoû, å matén, cwand vos m’ avoz dit :
- Dj’ inme bén do rwaitî l’ solea ki s’ lait djus. Alans vey li solea ki s’ coûtche.
- Bén, i fåt ratinde.
- Ratinde après cwè ?
- Ratinde après l’ eure ki l’ solea s’ lait djus.
Po cmincî, vos avoz-st avou l’ air tot peté. Adon, vos avoz rî d’ vos-minme.
- Dji m’ pinse todi so m’ planete ! m’ avoz vs dit.
Come d’ efet. Cand il est doze eures ås Estats Unis, li solea s’ coûtche sol France, come tot l’ monde el sait bén. I gn åreut k’ a saveur aler el France so ene munute di tins po saveur riloukî l’ solea ki s’ lait djus. Målureuzmint, li France est pår trop lon erî. Mins so vosse pitite bole, vos n’ avîz k’ a saetchî vosse tcheyire troes asdjamblêyes pus lon. Et vos rwaitîz l’ anuti tot côp k’ vos paiyîz après.
- On djoû, dj’ a veyou l’ solea aler djus cwarante-troes feyes !
Ene miete après, vos djhîz co :
- Cwand c’ est k’ on-z est tot disbåtchî, sav, on rwaite voltî l’ solea ki s’ lait djus.
- Li djoû des cwarante-troes côps, vos estîz si disbåtchî k’ çoula ?
Mins li Ptit Prince ni responda nén.
Hårdêye difoûtrinne