Sol deujhinme planete, i gn aveut on grandiveus :
- A ! a ! Vola èn admireu ! criya-t i did lon l’ grandiveus, cwand c’ est k’ il aviza li Ptit Prince.
Ca, po les grandiveus, les ôtès djins sont des admireus.
- Bondjoû, derit i li Ptit Prince. Vos avoz on drole di tchapea.
- C’ est po fé des tchapurnêyes, responda-t i l’ grandiveus. C’ est po fé des tchapurnêyes cand on clatche dins ses mwins por mi. Målureuzmint, gn a djamåy nolu ki passe avår ci.
- A ? derit i li Ptit Prince sins comprinde.
- Clatchîz dins vos mwins, don ! consia-t i l’ grandiveus.
Li Ptit Prince clatcha dins ses mwins. Li grandiveus, tot fjhant des ådiyosses, siclåtcha co ene tchapurnêye.
- Vola ene sacwè d’ pus plaijhant k’ amon li rwè, derit i li Ptit Prince dins lu-minme. Et i rataca a clatchî dins ses mwins. Adon, li grandiveus rataca a fé des tchapurnêyes tot sorlevant s’ tchapea.
Après cénk munutes, li Ptit Prince esteut hodé di rataker tofer li minme djeu :
- Et po fé tchaire li tchapea, kimint fwait on ?
Mins l’ grandiveus n’ l’ oya nén. Les grandiveus n’ oyèt ki les louwandjes.
- Est ç’ di bon ki vos m’ admirez si foirt ?
- K’ est çki ça vout dire, admirer ?
- Admirer, ça vout dire ricnoxhe ki dji so l’ pus bea, li mî moussî, li pus ritche eyet l’ pus sûti des omes so cisse planete cial.
- Mins vos estoz tot seu, su vosse planete !
- Fijhoz m’ plaijhi, admirez m’ tolminme !
- Dji vs admire, derit i li Ptit Prince tot hossant ene miete ses spales. Mins cwè çki çoula vs pout fé ?
Et li Ptit Prince endala.
«Oyi, ça : les grandès djins sont foû droles, vårmint», si djheut i tot simplumint, tins di s’ voyaedje.
Hårdêye difoûtrinne