Tot près dè vî pont, i-n-a-st-on p’tit banc
wice qui dj’a sovint miné m’ binamêye,
on banc come in-ôte, wice qui lès galants
minèt leû mon-keûr cwand l' nut′ èst toumêye...
Ah ! s’ ti poléves dîre tot çou qu’ t’as vèyou
dispôy qui t’ès la, pitit banc qu'on-z-inme !
Ah ! s’ ti poléves dîre tot çou qu’ t’as-st-oyou,
dès boûdes, dès sièrmints… èt tofér lès minmes !
Ti rapinses-tu co di l’osté passé ?
Nos t’ vinîz vèyî deûs fèyes li samin.ne…
Binamé p’tit banc, louke, rin qu’ d’î tûzer,
dji sin qu’ dji fruzih, ca dji r’veû Mad’lin.ne.
Awè, djèl riveû, èt c’èst là m’ måleûr :
n'è pôrè-dje don måy aswådjî m’ pinsêye ?
Sov’nance qui m’ fêt må, ca por mi l’ boneûr
n’èst pus qu'on bê sondje d’ine doûce djôye passêye…
Mins poqwè fåt-i, la qu'on-z-a vint-ans,
qui l’ coûr si lêsse prinde à ‘ne clére riyotrèye ?
Èt kimint s’ fêt-i, pôves sots qui n’s-èstans,
qu’ nos n’ nos dotanse nin qu’ l’amoûr n’èst qu’ tromp’rèye ?
Tot près dè vî pont, i-n-a-st-on p’tit banc
wice qui dj’a sovint miné m’ binamêye,
on banc come in-ôte wice qui lès galants
båhèt leû moncœûr qwand l’ nut′ èst toumêye…
Li p’tit banc
Ciste ouve ci egzistêye eto divins ds ôtès ortografeyes : Rifondou walon.Li p’tit banc