Tot près do vî pont, i n a-st on ptit banc
Wice ki dj' a sovint moenné m' binamêye;
On banc come èn ôte, wice ki les galants
Moennèt leu monkeur cwand l' nute est toumêye…
A ! s' ti pôreus[1] dire tot çou k' t' as veyou
Dispoy ki t' es la, pitit banc k' on-z inme !
A ! s' ti pôreus dire tot çou k' t' as-st oyou,
Des boudes, des siermints… et tofer les minmes !
Ti rapinses tu co di l' esté passé ?
Nos t' vinéns co vey[2] deus feyes li samwinne.
Binamé ptit banc, louke, rén k' d' î tuzer,
Dji sint[3] k' dji fruzixh, et dji rvoe Madlinne.
Awè, djel rivoe, et c' est la m' måleur.
N' è pôrè dj' don måy aswadji m' pinsêye ?
Sovnance ki m' fwait må, ca por mi l' bouneur
N' est pus k' on bea sondje, ene doûce djoye passêye.
Mins pocwè fåt i, la k' on-z a vint ans,
Ki l' cour si leye prinde a ene claire riyotreye ?
Et kimint s' fwait i, pôves sots ki ns estans,
K' nos n' nos dotanxhe nén k' l' amour n' est k' trompreye ?
Tot près do vî pont, i n a-st on ptit banc
Wice ki dj' a sovint moenné m' binamêye,
On banc come èn ôte wice ki les galants
Båjhèt leu monkeur cwand l' nute est toumêye…
Li ptit banc
Ciste ouve ci egzistêye eto divins ds ôtès ortografeyes : Feller (Piron).Li ptit banc