Li r’ssin.mieû
Li tchanson d’ sès cizètes
Ridougneût tot r’montant lès tiènes.
Lès fèmes potchin’ foû d’ leû cûjène,
Po ratinde si tchèrète.
Au vint come aus nûlias,
Il ariveût avou s’ bèsace,
Yinte sès dints on fistu d’ fènasse
Èt sès-ouys plin d’ solia
On-z-ètindeûve djèmi,
Lès finès lames, lès ârdjinterîyes :
On-z-âreût dit dèl djôye, afîye,
Tchaîte di s’ pîre à chûmî.
Tortos s’ lèyin’ à dîre,
Èt i v’nin’ choûter lès musiques
Divant d’ mète li pîce è s’ chirlique,
Il èralin’ plin d’ rîres.
Nin one po sûre pus lon,
L’ome qui saveût machî lès notes
Yinte lès coutias èt sès tchabotes…
Nin one po l’ sûre pus lon !