On z è dja surmint côsè din Li Rantoele, do voyadje k’on z’avét k’mincè avu Lucyin po n’alè vey din les scoles, les gamins, po l’zi dènè one pitite idêye du ç’ku çoula estot ku l’ walon.
Inter lu tossint èt lu racloyadje, çoula avét s’tu one bèle espérience kan o moussét din les scoles, din les classes po dènè l’istwère do walon, mès ossu l’zi dènè on pon dol gram.mère.
Tortos astét contint, nos-ontes bin sûr po l’walon, lès gamins èt lès gamines, qu’astint tot sbarès d’atinde çoula, mès ossu les mêsses du scoles ki n’a ruvnint nin du vey leûs gamins, po on kon, choûtu lès esplicâcions sin brontchè.
Din lu soucis du r’mète lu walon din les scoles du maniére continue, come lu vut lu « pacte d’excellence », falé bin trouvu one solucion.
Dj’avé sondjè ku lè mêsses du scole duvrint aprinre lu walon po lu rinde aus èlèves lu mî k’ i ponrint.
Po çoula, dj’avé proposè du dènè des cours aus mêsses, tortos asson.ne, èt l’zi dènè dol gram.mère.
Anut′, coula è bin oficiel !
A pôrtu do 19 du sètimbe 2020, tos lè miercrudi du 18 à 21 eûres, via les promotions sociales di Librômont, i gn ôrè dès cours du walon.
Lu cayè nu va nin èsse simpe à kumincè, mès nos î arivrans.
Pokwè cosè du çoula ?
Simplumint pasku si çoula n’è ku lu prumî pas, si çoula n’è k’on ptit pas din l’avancemint do rutour do walon, dju su bramint binôche du polu mète mu pitite grin.ne po fé avancè lu cayè.
Asteûr, i sufit du fé avancè ossu lu walon r’fondu po ku tortos pliche su comprinre.
Mès çoula, c’ è ko on-onte cayè.