On-z a ddja surmint cåzè, dins L’ Rantoele, do voyaedje k’ on-z aveut cmincî avou Lucyin Mahin, po ndaler vey les scolîs et scolresses dins les scoles, po lzî diner ene pitite idêye di çki çoula esteut ki l’ walon.
Etur li Tossint et l’ recloyaedje, çoula aveut stou ene bele esperyince cwand on moussive dins les scoles, dins les classes po diner l’ istwere do walon, mins ossu lzî diner on pô del grammaire.
Dj’ esténs tertos contins, nozôtes bén seur, po l’ walon, les gaméns et les gamenes, k’ estént tot sbarés d’ etinde çoula, mins ossu les mwaisses di scole ki n’ è rivnént nén do vey leus scolîs, po on côp, schoûter les esplicåcions sins brontchî.
Avou l’ såme[1] di rmete li walon dins les scoles di manire continowe, come li vout li « pake di meyeusté »[2], faleut bén trover ene solucion.
Dj’ aveu sondjî ki les mwaisses di scole divrént aprinde lu walon po l’ rinde ås eleves li mî k’ i pôrént. Po çoula, dj’ aveu propôzé di diner des cours ås mwaisses, tertos eshonne, et lzî diner del grammaire.
Enute, çoula est bén oficir ! A pårti do 19 di setimbe 2020, tos les mierkidi di 18 a 21 eures, pal voye des promocions sociåles di Libråmont, i gn årè des cours di walon.
Li cayet ni va nén esse simpe a kimincî, mins nos î arivrans.
Simplumint paski, si çoula n’ est ki li prumî pas, si çoula n’ est k’ ene pitite ascoxheye dins l’ avançmint do rtoû do walon, dju su fén binåjhe di poleur mete mi ptite grinne po fé avancî l’ agayon.
Asteure, i sufit di fé ossu tcheryî li walon rfondou, po ki tertos si poye comprinde.
Mins çoula, c’ est co ene ôte pwaire di mantches.
sicrît li 27 d’ awousse
Pî-notes