Novèles èt Binde à dèsséns/VIII
Ciste ouve ci egzistêye eto divins ds ôtès ortografeyes : Rifondou walon.
VIII
Côrnârd, vos-avoz dît « Côrnârd ! »
 vos crwèyîz qu’il aleûve dimorer à s’mince ! ‘Là qu’i tchaît su l’ Marîye : là, què t’ lî âreût d’né l’ Bon Diu, sins-aler à cofèsse. Èt pwis, à l’ dêrène broque :
« Djôzèf ! Faut qui dj’ vos l’ dîye, dji ratind famile ! »
« Comint ça ! Bin, dji n’ vos-a jamaîs djondu ! Â ça non ! »
Èt après ? ... One nwêre astaudje !...
« Mi : Djozèf, pwârter dès cwanes, dèdja d’vant d’ fé l’ grand nuk ! »
Vola ci qu’ c’èst, waîte di s’ lomer Djozèf !
C’èst come s’il âreût yeû tchaît dins l’ citèrne à l’ aîwe di plêve, pîre qui ça, dans l’ basse à bigau padrî l’ansènî !
I r’clape l’ uch à s’ ku. I pète au diâle. I r’mousse è s’ munuserîye. I skète li mantche di s’ mayèt à later, tant qu’i pout, dès côps su s’ banc d’ munusier.
« Tortotes lès minmes ! tins ! »
On n’ l’a pus r’vèyu deûs samin.nes au lon ! I n’ dwâme pus ! Èt quand i sère on’ oûy à mitan, c’èst todi l’ minme sondje què l’ dispiète : on djon.ne baurbu mousse è s’ tchambe. I vént s’achîre à l’tièsse do lét èt lî dîre : « Prind l’, prind l’ maugré tot ! » Èt i s’ dispiète sankènaîwe !
Ça n’ pout pus durer. I n’è pout pus !
Il èrva r’trover Marîye... Tènoz v’ aus coches : èle ni sét dîre comint qu’ ça lî a-st-arivé. Di tote maniére, i n’è sârè nin d’ pus, s’èle nè l’ sét nin lèye minme. Èt come èle nè lî d’mande rin, Djozèf drove sès lèpes : « C’èst bon, dji v’ prind come vos-èstoz ! »
I n’ pinseûve jamaîs è tchanter one parèye, mins ça lî a monté foû di s’ gâzi, sins r’môrd.
Li djoû dè l’mariadje tot l’ monde èst fin binauje por li. Sès soçons lî d’nè dès laudjès tapes dins s’ dos. C’èst qui l’ Marîye, c’èst dél bèle plante. I l’ sopèsenut dès-oûys. I-n-a d’pus d’onk qui djèrîye.
S’i sârîn’ ! Là waîte, i n’ savenut rin, ostant s’ mostrer plaîjant !
Li land’win tot timpe, lès pârints sont là, à tchicter d’one cwane à l’ôte. À l’longue, naujis dè ratinde, i lès vont fé lèver. Sins fé chonance, i tapenut on’ oûyâde su lès linçous. I n’ savenut nin qu’ Djozèf s’a r’lèvé à l’piquète do djoû, qu’il à moussî è s’ poulî, atraper on coq qui s’aprèsteûve à tchanter, èt d’vant qu’i n’ drove si bètch, i lî a côper s’ gârguète. Il a ramin.né saquants gotes di song dins-one jate.
One dès mans propôse di r’prinde lès linçous po lès r’laver. Djozèf sét bin qu’èle lès r’prind po-z-aler fé do ronflant dins l’ vijnauve. Èle dîront qu’ leû Djozèf ni s’a wêre soyu rastinre. Tos lès-omes sont tortos parèys, bin capâbes do foute leû feume à l’uch po qwè qu’i s’ fuche.
Ostant qu’èle n’auye pus à s’ tracassî po ç’t-afêre là.
Dispôy yut mwès qu’i vikenèt èchone, rin à dîre. On côp s’ bèsogne achèvéye, èle vint fé si p’tit tour à l’munuserîye. Gn’a rin d’ pus bia qui s’ sorîre. Saquants tch’fias qui passenut à l’cwane di s’ mouchwè d’ tièsse. Sès deûs mwins sèrenut s’ vinte su l’ cadau qu’on lî à d’né.
À tot prinde, c’è-st-one byin brâve comére. I-n-a combin come lèye qui s’ont faît arindjî ? I-n-a combin qui n’ sârîn’ pont fé d’èfant. Pace qui ça, ti nè l’ sés nin, quand ti faîs l’ grand nuk èvou one qu’a co tot ç’ qu’èle n’a qu’à d’ner.
Tot bin pèsé, tot bin rabatu, Sara, èlle aveût yeû sèt’ galants divant d’ s’ mète à min.nadje èvou l’ Tobie ! C’èst bin ça qu’a stî scrît dins l’ grand lîve.
Quand l’èfant sèrè là, ça sèrè…
Bâ ! Nos veûrans bin.
Note Wikisourd
Note do scrijheu: "Lingadje di Sauvadjènes".