Noveles et binde ås desséns/VIII
Ciste ouve ci egzistêye eto divins ds ôtès ortografeyes : Feller (rifondant namurwès).
VIII
Coirnåd ? Vos avoz dit « coirnåd » !
A ! vos creyîz k’ il aléve dimorer a smince ! La k’ i tchait so l’ Mareye, la, ki t’ lyi åreut dné l’ Bon Diu, sins aler a cofesse. Epwis, a l’ dierinne broke :
- Djôzef ! Fåt ki dj’ vos l’ deye, dji ratind famile !
- Comint ça ! Bén, dji n’ vos a djamåy djondu ! A ça non ! »
Et après ? Ene noere astådje !
- Mi, Djôzef, poirter des coines, dedja dvant d’ fé l’ grand nuk ! Vola cki c’ est, waite, di s’ lomer Djôzef !
C’ est come s’ il åreut yeu tchait dins l’ citere a l’ aiwe di plouve ; pire ki ça, dans l’ basse å bigåd padrî l’ ansinî !
I rclape l’ ouxh a s’ cou. I pete å diåle. I rmousse è s’ munujhreye. I skete li mantche di s’ mayet a later, tant k’ i pout, des côps so s’ banc d’ munujhî.
- Tertotes les minmes ! tins !
On n’ l’ a pus rveyou deus samwinnes å lon ! I n’ doime pus ! Et cwand i sere èn ouy a mitan, c’ est todi l’ minme sondje k’ el dispiete : on djonne bårbou mousse e s’ tchambe. I s’ vént ashire a l’ tiesse do lét et lyi dire : « Prind l’, prind l’ mågré tot ! » Et i s’ dispiete sankenaiwe !
Ça n’ pout pus durer. I n’ è pout pus !
Il erva rtrover Mareye. Tinoz vs ås coxhes : ele ni sait dire comint k’ ça lyi a-st arivé. Di tote manire, i n’ è sårè nén dpus, s’ ele n’ el sait nén leye-minme. Et come ele ni lyi dmande rén, Djôzef drove ses lepes :
- C’ est bon, dji vs prind come vos estoz !
I n’ pinséve djamåy è tchanter ene pareye, mins ça lyi a monté foû di s’ gozî, sins rmoird.
Li djoû do mariaedje, tot l’ monde est fén binåjhe por li. Ses soçons lyi dnèt des lådjès tapes dins s’ dos. C’ est ki l’ Mareye, c’ est del bele plante. I l’ sopeznut des ouys. I n a dpus d’ onk ki djereye.
S’ i sårént ! La, waite, i n’ savnut rén. Ostant s’ mostrer plaijhant !
Li londwin tot timpe, les parints sont la, a tchicter d’ ene coine a l’ ôte. A l’ longue, nåjhis do ratinde, i les vont fé lever. Sins fé shonnance, i tapnut èn ouyåde so les linçoûs. I n’ savnut nén k’ Djôzef s’ a rlevé a l’ pikete do djoû, k’ il a moussî è s’ poyî, atraper on cok ki s’ aprestéve a tchanter, et dvant k’ i n’ drove si betch, i lyi a côpé s’ garguete. Il a ramoenné sacwants gotes di sonk dins ene djate.
Ene des mans propôze di rprinde les linçoûs po les rlaver. Djôzef sait bén k’ ele les rprind po-z aler fé do ronflant dins l’ vijhnåve. Ele diront k’ leu Djôzef ni s’ a waire soyou rastini. Tos les omes sont tertos pareys, bén capåbes do fote leu feme a l’ ouxh po cwè ki s’ fouxhe.
Ostant k’ ele n’ åye pus a s’ tracassî po çt afwaire la.
Dispoy ût moes k’ i vicnut eshonne, rén a dire. On côp s’ bezogne achevêye, ele vént fé si ptit toû a l’ munujhreye. Gn a rén d’ pus bea ki s’ sorire. Sacwants tchveas ki pasnut a l’ coine di s’ mocoe d’ tiesse. Ses deus mwins sernut s’ vinte so l’ cado k’ on lyi a dné...
A tot prinde, c’ est ene byin bråve comere. I n a combin come leye ki s’ ont fwait arindjî ! I n a combin ki n’ sårint pont fé d’ efant.
Paski ça, ti n’ el sait nén, cwand ti fwais l’ grand nuk avou ene k’ a co tot çk’ ele n’ a k’ a dner.
Tot bén pezé, tot bén rabatou, Sara, elle aveut yeu set galants divant d’ s’ mete a manaedje avou l’ Tobî ! C’ est bén ça k’ est stî scrît dins l’ grand live.
Cwand l’ efant serè la, ça serè.
Ba ! Nos voerans bén.
Notes Wikisourd
replaidî el Rantoele l° 96 (ivier 2020-2021)