Novèles èt Binde à dèsséns/XVII
Ciste ouve ci egzistêye eto divins ds ôtès ortografeyes : Rifondou walon.
XXXI
Tchandjî d’ cassine
Dji n’aveû nin ausse di piède mi vikaîrîye po mès-èfants. Nin ausse di continuwer à viker rèssèréye dins l’ famile qui nos-avîn’ mètu d’ssu pîds tos lès deûs. Èt, si dj’ pèteûve èvôye, dji n’aveû nin co ausse di m’ veûy oblidjîye pa on juje, di waîtî à zèls one samin.ne dissu deûs èt l’ mitan dès condjîs.
Dj’aveû monté one famile, ci n’èsteût nin on tuwadje. Dj’aveû bin l’ drwèt d’ tchandjî d’ cassine èt d’ laîyî là mès cautes.
« Leû pa, c’èsteût one bièsse ! »
Dispôy nosse prumî, il aveût prins dès-aîrs di vî pa. I s’ mousseûve d’one casaque, todi l’ minme, qui n’ lacheût jamaîs. Nin co po l’ fé r’boûre on côp par samin.ne, po tuwer lès microbes glètés pas sès blèfauds d’èfants.
Quand nos nos frotîn’ li laurd èchone, dj’aveû è m’ tièsse qu’il èstîn’ sitindu yinte nos deûs, à s’ chûrer d’ rîre èt clatchî dins leûs mwins sûvant nos pôses. Quand i droveûve deûs botons di s’ brayète, c’èsteût wêre assez po laîyî passer l’ mwinre bokèt d’ saucisse qu’i m’aleût bourer.
Dji m’a stî r’moussî avou dès novias foûraus dins on botique. Dj’a rabroké al maujone, li timps d’ m’aler r’nètî èt d’ lès mète. Dj’a pèté èvôye sins rin èpwârter. I n’aveût qu’a r’vinde mès culotes al prumî foû- totin di l’intrè deûs djambes. Èt m’ quarantin.ne di paîres di solers à onk qu’i n’ veût voltî qu’ lès pîds.
Dji m’ sovin co dèl plaîjî qu’ dj’a yeû d’ moussî mièrseûle dins one tchambe d’ôtél, di r’ssèrer l’uch padri m’ ku, èt mi stinde dissu l’ lét lès brès au laudje come li vî Bon Diu d’ssu s’ crwwès. Ô ! Nin on grand lét avou dès falbalas, on lét qui fieût chîlter lès r’ssôrts chaque côp qui dj’ basculeû d’on costé à l’ ôte èt one tièstêre rostîye pa l’ solia.
Dj’a d’moré vélà deûs djoûs à bwêre l’êwe dèl saiwè. Sins mindjî, après-awè sucî l’ dêrène bouboune dèl satchot qu’ dj’aveû acheté à li stâcion avou mès dêrènès brokes.
One samin.ne pus taurd, il distributeû d’ biyèts à ravalé m’ cârte di banque. Dji n’aveû pupont d’ clicotias à r’vinde. Dji m’a ègadjî come feume à djoûrnéye. Dj’ stî dwârmu dins dès maujones po dès feumes pièrduwes, tot mindjant dès satchots d’ frites èt dès rodjes cèrvolas : à m’ plinde èt m’ ripintî dèl zine qui m’aveût prins, mi one comére qu’aveût tot !
Dj’aveû laté mès clés dins on batch à misére. Dj’a stî bouchî à l’uch di nosse maujone, ontieûse come on r’naud qu’areût stî prins par one poye.
« Dji vos d’mande vosse pârdon ! »
Dj’a d’vu r’ssûre one fameûse torgniole. Dj’a riv’nu à mî dins lès montéyes. Mi massale tchaufeût, bolante. Dj’aveû on crin au d’zeû d’on’ ouy.
Dj’a passé pa tos lès ponts sins awè l’ coradje di m’ foute à l’êwe.
Al pikète do djoû, dj’a moussî al police leûzî dîre qui dj’èsteû batuwe…
Po lès-èfants, i n’a rin volu motî. Il a stî oblidjî di s’ prusinter d’vant l’ juje po s’ètinde dîre qu’il aveût tos lès twârts. Dj’a r’trové m’ maujone. I m’ pâye one pinsion èt co lès cènes po lès-éfants. C’èst lî qui lès-èlèves.
I m’a co dît mèrci, l’ gote à l’ouy, dè l’zî laîyî…