Prumîre lète da Paul aus djins d’ Corinte/IX

Ciste ouve ci egzistêye eto divins ds ôtès ortografeyes : Ortografeye do scrijheu - Rifondou walon.

Sint På

IX

ratournaedje da Maurice Debaty, rortografyî e Feller pa Lucyin Mahin

Prumîre lète da Paul aus djins d’ Corinte, 2020

VIII

X

IX

1. Èst-ç' qui dji n’ so nin libe ? Èst-ç' qui dji n’ so nin apôte ? Èst-ç' qui dji n’a nin vèyu Jésus, nosse Signeûr ? N’èstoz nin mi-y-eûve dins l’ Sègneûr ?

2. Si, po dès-ôtes, dji n’ so nin apôte, djè l’ su au mwins por vos, pasqui vos-èstoz li catchèt di m’-y-ovradje dins l’ Sègneûr.

3. C’èst là qui dji m’ disfindrè conte lès cis qui m’ frin′ dès miséres.

4. Èst-ç' qui nos n’avans nin li drwèt dè mougni èt dè bwère ?

5. Èst-ç' qui nos n’avans nin l’ drwèt dè prinde avou nos one soû, qui seûye nosse feume, come fièt lès-ôtes apôtes èt lès fréres dau Sègneûr èt Céphas ?

6. Ou bin èst-ç' qui mi tot seu èt Barnabas, nos n’avans nin l’ drwèt dè n’ nin ovrer ?

7. Quî ni siève jamaîs dins one armée à s’ prôpe compte ? Quî plante dès reûjins èt ni lès mougne nin ? Quî faît pachi dès bèrbis, èt ni bwèt nin leû lècia ?

8. Èst-ç’ come ome qui dji cause insi ? Li lwè nèl dit-st-èle nin ossi ?

9. Pasqui, il èst scrît dins li lwè da Moyise :

«  Ti n’ musèlerè nin on boû quand i spate lès scaugnes »

Li Bon Diè a-t-i del pwin.ne po lès boûs…

10. … ou cause-t-i seûlmint à cause di nos ? Ayi, c’è-st-à à cause di nos qui ça a stî scrît ; li ci qui fouye li tère èl dwèt fé avou èspwêr èt li ci qui spate lès scaugnes dwèt yu l’èspwêr d’oyu s’ paurt.

11. Si nos avans sèmé por vos lès bins di l’èsprit, èst-ç’ trop dmander dè mèchner lès bins dèl tère ?

12. S'i-gn-a dès-ôtes qui è profitèt su vosse dos, n’èst-c’ nin pus rade à vos di-z-è profiter ? Mins, nos n’ nos-avans nin sièrvu di ci drwèt-là, sûrmint nin, po n’ nin èburtaquer l’Èvanjîle da Christ.

13. Ni savoz nin qui lès cis qui ont dès-ovradjes sacrés sont noûris pa l’ tempe ; qui lès cis qui sièrvèt à l’autél ont leû paurt di çu qui è-st-ofri su l’autél ?

14. Ossi, li Sègneûr a one lwè : « lès cis qui proclamèt l’Èvanjîle divèt viker di l’Èvanjîle.

15. Por mi, dji n’ m’a sièrvu di nuk di cès drwèts-là, èt dji n’ sicrî nin come ça po qu’on m’ les done, pasqui dj’aîmrè co mia moru. I-gn-a nuk qui m’ pidrè ci glwère-là !

16. Pwarter l’Èvanjile n’èst nin por mi one glwère, pasqui dj’î so oblidji ; dj’aurè dès maleûrs, si dji nèl faî nin.

17. Si djè l’ faî voltî, dji sèrè récompinsé ; mins, si djè l’ faî conte mi gout, c’èst come on pwès qui m’ sèreut confyi.

18. Qui sèrè mi rèscompinse ? C’è-st-en prétchant l’Èvanjîle, po rin, sins mi siervu dès drwèts qui l’Èvanjîle m’a dné.

19. Pasqui, minme si dji so libe aviè tortos, dji m’a mètu po sièrvu tortos po-z-è touchi li pus possibe !

20. Avou lès Juifs, dj'a stî Juif po fé come zèls.

21. Avou lès cis qui n’ont pont di lwè, dj’a faît come zèls, pasqui mi, dji n’a qu’one lwè : li cine da Christ.

22. Dja stî flauwe avou lès flauwes po gangni lès flauwes. Dji m’a faît à tot po tortos po-z-è sauver saquantes.

23. Dji faî tot ça à cause di l’Èvanjîle, po-z-awè m’ paurt.

24. Ni savoz nin qui lès cis qui courèt dins lès arin.nes, i courèt tortos, mins, i-gn-a qu’onk qui gangne ? Adon, couroz po-z-oyu l' pris do gangnant.

25. Tos lès djouweûs fièt dès réjimes po-z-oyu one rèscompinse matérièle. Mins nos-ôtes, nos nos batans po one rèscompinse imatérièle.

26. Adon, mi, dji coûr, nin po gangni ; dji done dès côps d’ pougn, mins nin à maulvau.

27. Qui dè contraîre, dji fwarci m’ cwar èt djè l’ controle po n’ nin, après oyu prétchi aus-ôtes, yèsse foutu foû.