Prumîre lète da Paul aus djins d’ Corinte/XIII
XIII
1. Quand minme dji cauzreu lès lingadjes dès-omes èt dès-andjes, si dji n’a nin l’amoûr, dji so dè bronze qui bouche ou one cloke qui sone.
2. Quand minme dj’aureu li cadau dès profêtes, dèl syince di tos lès mistêres èt di totes lès conichances, quand minme dj’aureu li fwè à fé boudji lès montagnes, si dji n’a nin l’amoûr, tot ça n’ siève à rin.
3. Quand minme dji donreu tot ç’ qui dj’a aus poûves po qu’i mougnèche a leû fwin, quand minme dji donreu mi cwar po yèsse brûlé, si dji n’a nin l’amoûr, ça n’ siève à rin.
4. L’amoûr a bin l’ timps ; l’amoûr èst la po-z-aîdî ; i n’èst nin djalous ; l’amoûr ni s’ vante nin ; i n’ si gonfèle nin po yèsse vèyu ;…
5. …i n’ faît nin çu qu’i n’ faut nin ; i n’ waîte nin à gangni ; i n’ si mwaîdjit nin, i n’ tûze nin à mau,…
6. …i n’ si plaît nin dins ç’ qui n’èst nin jusse, mins i waîte après çu qui èst vraî.
7. I pardone tot, i crwèt tot, il èspère tot, i supwate tot.
8. L’amoûr ni toume jamaîs ; qui ça seûye dès profécîes, dès langues, dèl conichance, èle sèront stopées.
9. Pasqui ci n’èst qu’à mitan qui nos advinans, qui nos conichans.
10. Mins quand çu qui sèrè parfaît sèrè vnu, c’èst çu qui è-st-a mitan qui sèrè stopé.
11. Quand dj’èsteu gamin, dji causeu come on gamin, dji tûzeûve come on gamin. Quand dj'a divnu on-ome, dja stopé çu qui èsteut dè gamin.
12. Audjourdu, nos vèyans pa on murwè, d’one maniére nin fwart clére, mins adon, nos vîrans face à face. Audjourdu, dji coneu à bokèts, mins adon, dji conichrè come dj’a stî conu.
13. Asteûre, trwès-afêres dimorèt : li fwè, l’èspwèr, mins li pus fwate, c’èst l’amoûr.