Prumîre lète da Paul aus djins d’ Corinte/XVI
XVI
1. Po li colèke po lès sints, fioz, vos ossi, come dj’a oblidji lès-Èglîjes dèl Galacîe.
2. Qui chake di vos, li prumî djoû dèl samwin.ne, mète di costé çu qu’i pout sûvant sès moyins po n’ nin ratinde qui dj’arive po fé lès colèkes.
3. Èt quand dji sèrè vnu, dj’èvoûyrè, avou dès letes, lès cis qui vos-auroz admètus po pwarter çu qui vos-avoz diné à Jérusalem.
4. Si ça vaut lès pwin.nes qui dj’î vauye mi-minme, i front li voyadje avou mi.
5. Dji vêrè addé vos quand dj’aurè truvièrsé li Macédoine, pasqui dji truvièrséyrè li Macédoine.
6. Quitfîe qui dji dimeûrrè addé vos, ou minme passer l’ivièr po qui vos m’ fioche miner la ou dj’irè.
7. Dji n’ vou nin, ci côp-ci, vos veûy en passant èt dji vôreu bin dimorer one miète avou vos, si l’ Bon Diè li vout bin.
8. Dji dimeurrè quand minme à Ephèse jusqu’à li Pintcoute,…
9. …pasqui one uch s’a douvièt à çu qui dji faî, mins lès-ènmis sont leûs brâmint.
10. Si Timothée arive, fioz qu’i n’auye nin peû addé vos, pasqu’il èst come à l’ovradje dau Bon Diè.
11. Qui nuk nèl mèprîje. Raminoz-l’ en paîs po qu’i vègne avou mi, pasqui djè l' ratind avou lès fréres.
12. Tant qu’au frére Apollos, djè lî a dmandé et ridmandé po qu’i vauye addé vos - èt lès fréres avou - mins i n’a nin vlu, po l’ momint, todi ; il irè quand il aurè l’ timps.
13. Dimorez fwart dins l’ fwè, soyoz dès fwarts-omes.
14. Qui dins tos vos-ôtes, tot si fèye avou amoûr.
15. Dji vos ricmande co çoci, fréres : vos savoz qui li famile da Stéphanas, qu’è-st-au dèbut di l’Acayîe, s’a mètu au sèrvice dès sints.
16. Choûtoz bin cès djins-là èt tos lès cis qui fièt li minme ovradje.
17. Dji m’ rafîe qui Stéphanas, Fortunatus èt Achaïcus soyèche là ; i vos-ont remplacé quand vos n’èstîz nin là.
18. Avou zèls, dj'èsteu bin paujêre. I vos lès faut vîr voltî, dès djins parèyes.
19. Les-Èglîjes d’Asie vos dijèt bondjoû. Aquilas èt Pricile avou l’Èglîje qui èst dins leû maujone, vos saluwèt.
20. Tos lès fréres vos saluwèt. Saluwoz v’ n’on l’ôte pa on sint bètche.
21. Mi saluwadje vint di m’ mwin da mi, Paul.
22. Si onk ni veût nin voltî li Sègneûr, qu’i seuye « anathème » ! Maranatha.
23. Qui li grâce dau Sègneûr seûye todi avou vos.
24. Mi amoûr è-st-avou vos tortos, dins Christ.