1 — Po çou k' est des tchås ofreyes ås idoles, nos savans bén k' tertos ki ns avans l' sepyince : el sepyince ki rind loigne, mins l' amour fwait crexhe.
2 — Si ene sakî pinse conoxhe ene sacwè, èç sakî ci n' el a nén co conoxhou comifåt.
3 — Tenawete, si ene sakî conoxhe li Bon Diu, ci-la serè conoxhou d' Lu.
4 — Po les tchås ofreyes ås idoles, nos savans bén k' des idoles, end a pont nole pårt. Eyet k' i gn a k' on seu Bon Diu.
5 — Paski, cwè k' i gn åye çou k' on lome des « diès », ubén dins l' cir u co sol Daegne — ey i gn a bråmint des diès eyet des signeurs —,…
6 — … po nozôtes, i n' egzistêye k' on Bon Diu, li Pere di kî totafwait vént. Et — poy ki ns estans e-n on seu Signeur, Djezus Crisse — ki totafwait egzistêye par Lu. Pår nozôtes, tot parey, nos egzistans par Lu.
7 — Mins nerén, tertos n' el sepnut nén ; oyi, end a sacwants, eco ritnous pal dujhance di siervi les idoles, ki magnnut des tchås ki lzî ont stî ofreyes, a ces idoles la. Çoula paski leu consyince est flåwe eyet mannete.
8 — Ci n' est nén ene nouriteure ki nos raprepeyrè do Bon Diu ; si nos n' è magnans nén, nos n' årans rén d' moens eyet si nos è magnans, nos n' årans rén d' pus.
9 — Prindoz asteme cwanlminme : ki vosse droet (di magnî del tchå ofreye ås idoles) ni dvegne nén ene pire e l' roye po les flåwes.
10 — Paski, si onk ti voet, èt-minme ki sait bén cwè, ashît al tåve dins on timpe d' idoles, si s' consyince est flåwe, est çk' ele n' el boutrè nén, lu, a croere ås idoles.
11 — C' est insi k' el flåwe perixhrè a cåze di s' camaeråde, k' est portant on fré ki l' Crisse est moirt por lu.
12 — E fjhant do må insi ås frés tot coschoyant leu flåwe consyince, vos fjhoz do må å Crisse.
13 — Vola pocwè, si ene nouriteure fwait distourner m' fré del droete voye, dji n' è magnrè måy pus, po n' nén distourner m' fré.