1 — Vinans è a çou k' vos m' av sicrît divins vosse lete. C' est mî po l' ome di n' pont awè d' feme.
2 — Portant, a cåze des temtåcions do seke, ki tchaeke ome åye ene feme, eyet ki tchaeke feme åye èn ome.
3 — Ki l' ome dene a s' feme çou k' i lyi doet estant maryîs, eyet sifwaitmint li feme a l' ome.
4 — El feme n' a pont d' povwer so s' coir, c' est s'-n ome k' end est mwaisse : mins, sifwaitmint, l' ome n' a pont d' povwer so s' coir, c' est s' feme k' end est mwaisse.
5 — Ni vos rfuzez nén onk a l' ôte, udonbén djusse po on ptit moumint, tot-z estant dacoird, po k' vos åyoxhe el tins d' aler priyî. Adonpwis, vitmint vos rtrover ; ôtrumint, li Diåle vos vénreut temter, kinoxhant vosse flåwisté tot rescontrant des belès comeres u des beas valets.
6 — Dji vs di çoula, come on bon consey, nén po vs oblidjî.
7 — Dji vôreu bén k' tos les omes fouxhnuxhe come mi ; mins, tchaeke riçût då Bon Diu on don, rén k' por lu, onk d' ene manire eyet l' ôte d' ene ôte.
8 — A tos les cis ki n' sont nén maryîs u k' ont pierdou leu feme, dj' elzî di k' c' est bén di dmorer come mi.
9 — Mins, s' i n' si savnut ratni, k' i s' mareynuxhe, pask' i våt mî s' maryî ki d' tchaire dins l' petchî !
10 — Ås cis ki sont maryîs, dji dene èn ôre — c' est nén mi, c' est l' Signeur k' el baye —: ki l' feme dimeure avou si ome !
11 — Si ele n' est pus avou lu, k' ele dimeure sins s' maryî u k' ele rimete les catches e for avou lu eyet k' l' ome n' el divoirceye nén.
12 — A tos les ôtes — ci côp ci, ci n' est nén l' Signeur, mins c' est mi k' el dit — « si on fré a ene feme ki n' croet nén - yet k' elle est dacoird po dmorer avou lu, k' i n' el divoirceye nén.
13 — Yet si ene feme a èn ome ki ni croet nén yet k' elle est dacoird di dmorer avou lu, k' ele n' el divoirceye nén ».
14 — Paski l' ome ki n' croet nén dvént sint pa s' feme ki croet, yet l' feme ki n' croet nén dvént sinte på fré ki croet. Ôtrumint les efants serént taetchîs, adon k' onk des parints est sint.
15 — Si l' ci ki ni croet nén vout divoircî, k' i dvoirceye ; el fré ou l' sour ki croet n' est pus loyî på mariaedje, dins ç' cas la. El Bon Diu nos a houkî po viker dins l' påye.
16 — Taiss k' oyi, comint sawè, feme, si vos wådroz vost ome ? Ubén comint sawè, ome, si vos wådroz vosse feme ?
17 — Seulmint, ki tchaeke rote shuvant l' pårt d' ovraedje k' el Signeur lyi a dmandé, å no då Bon Diu ; c' est insi ki dji dene des ôres dins totes les eglijhes.
18 — Ene sakî a stî houkî, tot-z estant dedja discaloté ? K' i dmane discaloté ! Èn ôte a stî houkî, tot n' estant nén discaloté ? K' i n' si fwaiye nén discaloter !
19 — El discalotaedje n' est rén yet li nén-discalotaedje n' a nole impôrtance nerén. Mins çou k' est tot, c' est les ôres då Bon Diu.
20 — Ki tchaeconk dimane come il esteut cwand il a stî houkî.
21 — Avoz stî houkî estant esclåve ? Ni vs è fjhoz nén si vos dmorez on sclåve. Mins, si vos ploz divni libe, profitez d' l' ocåzion.
22 — Paski l' esclåve k' a stî houkî dins l' Signeur est libe dins l' Signeur, ostant k' l' ome libe k' a stî houkî, a divnou èn esclåve då Crisse.
23 — Vs avoz stî ratchté å pris foirt ; ni divnoz nén esclåve des omes.
24 — Ki tchaeke fré dimane divant l' Bon Diu come il esteut cwand il a stî houkî.
25 — Po çk' est do celibat, dji n' a pont d' ôre då Signeur ; mins, dji di çki dj' pinse, tot cåzant come èn ome k' el Signeur, dins si amiståvté, a rindou fiyåve.
26 — Vocial çki dji pinse di bon, a cåze des dzôrnances d' asteure ; c' est bon a èn ome d' esse come çoula.
27 — Estoz loyî a ene feme ? Èn waitîz nén a spiyî ç' loyén la ; n' estoz nén loyî a ene feme ? ni cweroz nén après ene feme.
28 — Si vos vs vloz maryî, vos n' froz nén on petchî, eyet si l' båshele k' est co etire si mareye, ele ni frè nén on petchî ; mins ces djins la åront des mizeres dins leu coir ; eyet mi, dji prind asteme a vozôtes.
29 — Frés, dji vos l' doe dire : li tins passe si rade ! ; a pårti d' asteure, ki les cis k' ont ene feme fwaiynuxhe come s' i n' end årént pont…
30 — ki les cis ki braiynut come s' i n' brairént nén, les cis ki sont binåjhes come s' i n' l' estént nén, les cis k' atchêynut totes sôres di béns, come si n' avént rén…
31 — eyet les cis ki profitnut des plaijhis do monde come s' i n' s' è profitrént nén; paski les plaijhis do monde, i n' è profitront nén advitam.
32 — Paski dji vôreu k' vos vikîxhe a vost åjhe. El ci ki n' est nén maryî s' acdene ås afwaires då Bon Diu.
33 — Mins l' ci k' est maryî si doet ocuper des afwaires do monde, metans, des moyéns di plaire a s' feme. Si est i ashiou so deus tcheyires.
34. El feme sins ome, come el båshele nén marieye, ele si pout acdiner ås afwaires då Signeur, por leye esse sinte dins s' coir eyet dins s' tiesse. Dabôrd ki l' cene k' est marieye, ele si formagne po les afwaires do monde, means des moyéns di plaire a s'-n ome.
35 — Dji di çoula, c' est po vozôtes ; ci n' est nén po vs atraper, c' est po vos poirter a çk' est bén yet çou k' est prôpe a vos loyî å Signeur, sins dveur tuzer a ôte tchoi.
36 — Si on djonne ome pinse k' i n' sårè respecter si crapåde k' est co etire, k' i boût por leye, et k' i va Wikt:aler a l' årmå dvant cwatre eures, k' i fwaiye çou k' i vout et k' i s' mareye ; insi, i n' frè pont d' petchî.
37 — Mins, s' il est foirt assez po nel nén aduzer, s' i gn a nolu k' el tchôke a l' sipozer, s' il est mwaisse di s' prôpe volté, eyet k' il a decidé, al fén des féns, di n' si nén maryî, il a bén råjhon.
38 — Insi, li ci ki s' mareye fwait bén, mins l' ci ki n' si mareye nén fwait co mî.
39 — Ene feme est aloyeye a si ome ossu lontins k' i vike; mins, s' i mourt, elle est libe di s' rimaryî avou kî çk' ele vout. Seulmint, ki ci soeye rilidjeuzmint.
40 — Portant, ele serè pus binåjhe, a m' shonnance, si ele dimane sins s' rimaryî ; eyet dji pinse dire çoula dins l' esprit då Bon Diu.