Prumire lete da sint På ås djins d’ Corinte/VI
VI
1 — Ene sakî emey vozôtes, cwand il a ene brete avou ene sakî d' ôte : est çki s' oizreut disfinde divant les mescreyants — mins nén dvant les sints ? Èn savoz don nén ki c' est les sints ki djudjront l' monde ?
2 — Eyet, si c' est pa vozôtes k' el monde est djudjî, ni seroz nén capåbe di djudjî les ptitès afwaires ?
3 — Ni savoz nén ki nos djudjrans les andjes ? Ça fwait : pocwè nén les afwaires di nosse monde ?
4 — Adon, cwand vs avoz des rujhes avou les afwaires d' èç monde ci, c' est des djins ki l' Eglijhe s' è fote di zels ki, vos, vos metoz come djudjes !
5 — Dji vos l' di po vs ahonti. Dins tos vozôtes, i gn a nén onk k' est comifåt ki pôrè djudjî inte ses frés.
6 — Mins, on fré s' disfind conte èn ôte, eyet tot çoula dvant les cis ki ni croeynut nén !
7 — Po vozôtes, c' est ddja on furlaedje d' awè des djudjes etur vozôtes. Pocwè ni sopoirtez nén purade ene invaneye ? Pocwè n' vos leyîz nén purade espotchî ?
8 — Mins c' est vos ki fwait les djudjes eyet spotchî les ôtes, ki sont vos frés ?
9 — Èn savoz nén k' les indjusses ni seront nén dins l' payis då Bon Diu ? Èn vos margayîz nén : ni les disbåtchîs, ni les måfiyants, ni les cis ki vont coûtchî avou des ôtes femes u omes, ni les beveus, ni les gateboks,…
10 — Ni les hapeus, ni les pice-crosses, n' iront dins l' payis då Bon Diu.
11 — Eyet c' est rola k' vos estoz, sacwants d' vozôtes. Tenawete, vs avoz stî rlavés, vs estoz divnous « sints », mins vs avoz stî djustifyîs, å no då Signeur Djezus — yet pa l' Esprit d' nosse Bon Diu.
12 — Dji pou leyî tot, mins tot n' sieve nén todi — yet dji n' èm lairè nén abate pa tolminme kî !
13 — L' amagnî, c' est pol bodene eyet l' bodene po l' amagnî ; eyet l' Bon Diu distrurè onk come l' ôte. Dj' el di e vraiy: li coir n' est nén fwait po l' disbåtche ; il est distinou do Signeur eyet l' Signeur distént l' coir.
14 — Eyet l' Bon Diu, k' a fwait raviker l' Signeur, nos frè raviker eto pa s' pouxhance.
15 — Èn savoz nén k' vos coirs sont des bokets då Crisse ? Est çki dji piedrè des bokets då Crisse po-z è fé des bokets d' ene feme di mwaijhe vicance ? Taiss ki neni !
16 — N' savoz nén k' el ci ki s' atele a ene feme di mwaijhe vicance, il n' fwait k' on seu coir avou leye ? Paski « les deus dvénront on seu coir », dit-st i.
17 — Årvierdimint, li ci ki s' atele å Signeur, i n' fwait avou lu k' on seu esprit.
18 — Statez d' vos moenner måle veye. Minme si ene sakî petche, il est foû do coir ; mins, li ci ki vike e l' disbåtche fwait petchî conte ès prôpe coir.
19 — Èn savoz nén çoula ? Vosse coir, c' est l' måjhone då Sint-Spér k' est dvins vozôtes — eyet ki vs avoz rçû då Bon Diu. Ça fwait k' vos n' estoz nén da vozôtes,…
20 — …paski vs avoz stî redîmé a on grand pris. Rindoz glwere å Bon Diu dins vosse coir eyet divins vost esprit k' apårtegnnut å Bon Diu.