Prumire lete da sint På ås djins d’ Corinte/V
V
1 — On-z ôt todi dire ki vos vs tinoz må ; eyet k' vos vs tinoz télmint må k' ç’ est co pé k’ amon les cis ki n’ croeynut nén ; c’ est télmint pé k’ i gn a onk di vozôtes ki coûtche avou l' feme d’ ès pa !
2 — Eyet vs estoz télmint pouris di n' tuzer k’ a vozôtes ki vs n’ avoz nén prindou l’ doû po ki l' ci k' a fwait çoula soeye fotou a l’ ouxh di vosse soce.
3 — Po mi, ki n’ a pupont d’ coir, mins k' a co m’ tiesse, dj' a ddja clawé m' djudjmint so l' ci k' a fwait ça, come si dj’ sereu rola.
4 — Paski, å no då Signeur Djezus, vos yet m’ tiesse, nos estans rashonnés avou li povwer då Signeur Djezus.
5 — K’ on tél ome soeye tapé å Diåle po distrure les coirs po ki l’ tiesse soeye sipårgneye li djoû då Signeur Djezus.
6 — Ele n’ est nén foirt bele, vosse glwere : ni savoz nén k’ ene miete di yesses fwait monter tote li påsse ?
7 — Rissaetchîz vos viyès leyes po divni ene novele påsse asteure ki vs estoz sins yesses, pask' el Crisse, nosse Påke a stî axhoré.
8 — Adon, fijhans l’ fiesse, nén avou des viyès leyes, ni avou des mwaijhès yesses, mins avou les pwins sins leveure di çou k' est l’ veur.
9 — Dji vs a scrît dins m’ lete k' i n' fåt nén awè des rapoirts avou les dislaxhîs,…
10 — Dj' ô bén : ces djins la ki vos djhént k' il estént vos frés, mins ki sont des pice-crosses, des beveus, des calfakes, des hapeus, …
11 — … eyet minme di n' nén magnî avou des sfwaits.
12 — Cwè çki dj' a-st a poirter on djudjmint po les djins ki sont foû d' nosse soce ? N’ estans ns nén des djudjes fok po les cis ki sont ddins ?
13 — Li ci k' est foû, c’ est l’ Bon Diu ki l’ djudjrè ; fotoz a l’ ouxh les calins ki sont co emey vozôtes.