Prumîre lète da Paul aus djins d’ Corinte/VI
VI
1. One saquî di vos, quand il a one misére avou on-ôte, èst-ç' qu’i wazrè bin si disfinde divant lès mécrèyants — èt nin divant lès sints ? Ni savoz nin qui lès sints djujront li monde ?
2. Èt, si c’èst par vos qui l’ monde èst djujé, ni sèroz nin capâbe dè djujer lès ptitès-afêres ?
3. Ni savoz nin qui nos djujrans lès-andjes ? Poqwè nin ? À pus fwate raîson, lès-afêres di nosse monde.
4. Adon, quand vos-avoz dès rûses avou lès-afêres di ç’ monde-ci, c’èst dès djins qui l’Èglîje s’è fout, qui, vos, vos mètoz come djujes !
5. Dji vos-el dit à vosse djin.ne. Dins tos vos-ôtes, i-gn-a nin onk di come i faut qui poûrè djujer intur sès fréres.
6. Mins, on frére si disfind conte on-ôte frére èt tot ça divant lès cis qui n’ crwèyèt nin !
7. Por vos, c’èst dèdja one piète d’oyu dès djujes ètur vos-ôtes. Poqwè ni supwartoz nin pus rade one injustice ? Poqwè ni vos lèyoz nin pus rade sipolyi ?
8. Mins, c’èst vos qui fioz lès djujes èt spolyi lès-ôtes, quî sont vos fréres.
9. Ni savoz nin qui lès-injusses ni sèront nin dins l’ payis dau Bon Diè ? Ni vos brouyoz nin : ni lès disbautchis, ni lès-idolâtes, ni lès cis qui vont coutchi avou dès-ôtes feumes ou omes, ni lès bèveûs, ni lès tapètes,…
10. …ni lès voleûrs, ni lès rapias, nuk di cès-la n’îrè dins l’ payis dau Bon Diè.
11. Èt c’èst là qu' vos-èstîz, saquantes di vos-ôtes. Mins, vos avoz stî rlavés, vos-èstoz divnus « sints », mins vos-avoz stî djustifiés, au nom dè Sègneûr Djésus ‒ èt pa l’èsprit da nosse Bon Diè.
12. Dji m' pou pèrmète tot, mins tot ni siève nin todi ‒ èt dji n’ mi lâirè nin abate pa n’importu qwè !
13. Li noûriture, c’èst po l’ vinte èt l’ vinte po l’ noûriture ; èt l’ Bon Diè distrûrè l’onk come l’ôte. Mins, li cwar n’èst nin po s’ mau miner ; il èst po l’ Sègneûr èt l’ Sègneûr po l’ cwar.
14. Èt l’ Bon Diè qui a faît raviker l’ Sègneûr nos frè raviker ossi pa s’ pouvwêr.
15. Ni savoz nin qui vos cwars sont dès bokets da Christ ? Èst-ç' qui dji pidrè dès bokets da Christ po-z-è fé dès bokets d’one feume di mwaîje vîe ? Bin sûr qui non !
16. Ni savoz nin qui li ci qui s’atèle à one feume di mwaîje vîe è-st-on seûl cwar avou lèye ? Pasqui, il èst dit :17. Mins li ci qui s’atèle au Sègneûr è-st-avou li on seûl èsprit.
18. Lachîz di vos mau miner. N’impôrtu qué pètchî qui l’ome fèye, il èst foû dè cwar ; mins li ci qui s’ mine mau faît on pètchî conte si proûpe cwar.
19. Ni savoz nin çoci ? Vosse cwar èst li maujone dau Sint-Esprit qui èst dins vos ‒ èt qui vos avoz rçû dau Bon Diè ‒ èt vos n’èstoz nin à vos-minme,…
20. …pasqui vos-avoz stî rachtés à on grand pris. Rindez glwère au Bon Diè dins vosse cwar èt vost èsprit, qui apartinèt au Bon Diè.