Prumire lete da sint På ås djins d’ Corinte/XI
XI
1 — Fijhoz yet soeyoz come mi, come dji so èm-minme come Crisse
2 — Dji vs di dank di çki vos vos sovnoz d' mi po totès sôres d' råjhons yet ki vs avoz ritnou mes messaedjes come dji vos lz avoz fwait sawè.
3 — Poirtant, dji vôreu k' vos l' seuxhoxhe : Crisse est l' mwaisse d' tos les omes ; l' ome est l' mwaisse del feme ey el Bon Diu est l' mwaisse do Crisse.
4 — Tchaeke ome ki dit ses priyaedjes u lét des proféceyes avou ene sacwè so s' tiesse ni fwait nén oneur a s' mwaisse.
5 — Mins nerén, tote feme ki dit ses priyaedjes u lét des proféceyes sins rén so s' tiesse, ni fwait nén oneur a s' mwaisse ; c' est come si ele n' aveut pont di tchveas.
6 — Paski si ene feme n' a pont di vwele, ele n' a k' a côper ses tchveas. Do côp, si c' est mwais po ene feme d' awè les tchveas côpés ubén d' esse raezêye, ele n' a k' a mete on vwele.
7 — L' ome ni doet nén mete on vwele dzeu s' tiesse, veyånmint k' il est l' imådje ey el glwere do Bon Diu, adon ki l' feme est li glwere da l' ome.
8 — Oyi, l' ome n' a nén stî saetchî del feme, mins l' feme a stî saetchêye di l' ome.
9 — Yeyet l' ome n' a nén stî metou å monde a cåze del feme, mins bén l' feme a cåze di l' ome.
10 — Vocial pocwè li feme, a cåze des andjes, li feme doet awè dzeu s' tiesse ene prouve come cwè elle dipind d' ès mwaisse.
11 — Pår, dins l' Signeur, el feme n' est nén sins l' ome yet l' ome n' est nén sins l' feme.
12 — Adon, come el feme a stî saetchêye di l' ome, l' ome a vnou å monde pa l' feme yet tot vént do Bon Diu.
13 — Djudjoz-e vos-minmes ; est-ç' comifåt k' ene feme preye el Bon Diu sins awè on vwele ?
14 — El nateure leye-minme ni dit-ele nén k' c' est honteus po l' ome d' awè des grands tchfeas ?
15 — Totfeye, est-çki c' est ene glwere pol feme d' e-n aveur ? Oyi, ses tchveas l' ont dné come on vwele.
16 — Si ene sakî vs dit l' contråve, nos n' avans nén ciste abitude la, ni les Eglijhes då Bon Diu.
17 — Tot fijhant èç messaedje ci, çki dji n' so nén binåjhe, c' est k' vos vs rashonnez nén po esse meyeus, mins co pé.
18 — Aprume, dj' aprind ki cwand vos vs rashonnez, vos n' estoz nén d' acoird, çki n' mi sbare nén, d' on costé.
19 — Fåt bén k' i gn åye etur vozôtes des bisbrouyes po k' les cis k' sont comifåts s' ercoxhnuxhe dins tos vozôtes.
20 — Adon, cwand vos vs rashonnez, ç' n' est nén po mindjî l' soper då Signeur.
21 — Pask' e mindjant dvant les ôtes, tchaeke prind ès prôpe soper ey onk a fwin yet l' ôte est cût.
22 — N' av pont d' måjhone po mindji yet boere ? Udonbén dilaidoz-vs l' Eglijhe då Bon Diu tot dilaidant les cis k' n' ont rén ? Ki vloz ki dji dijhe ? Vs ecinser ? Po ça, dji n' vos e dene pont.
23 — Paski mi, dj' a rçoû do Signeur çki dji vs a transmetou. El Signeur Djezus, el nut wice k' on l' a vindou, a pris do pwin ey...
24 — ...après awè dit dank, i l' a côpé yet dit : « Çoucial, c' est m' coir k' est po vos ; fijhoz ça e vs sovnant d' mi ».
25 — Adonpwis, après l' soper, il a prindou ene côpe ey il a dit : « C' est l' côpe del novele aloyance dins m' sonk. Fijhoz çouci, e vs sovnant d' mi, tchaeke côp k' vos e boeroz. »
26 — Paski tchaeke côp k' vos mindjroz ci pwin la yet k' vos boeroz ci côpe la, vs anonçroz el moirt då Signeur disk' a çk' i rvegne.
27 — Vola pocwè li ci ki mindjrè li pwin yet boerè l' côpe då Signeur, e s' e fotant, ci-la serè coupåbe avou l' coir yet l' sonk då Signeur.
28 — Ki tchaeke rwaite dins lu eyet come çoula i mindje el pwin eyet boet l' côpe.
29 — Paski, li ci ki mindje yet boet sins rconoxhe li coir då Signeur, mindje yet boet on djudmint conte lu.
30 — C' est po ça k' i gn a dins vozôtes bråmint des malades yet des mezalés eyet ki bråmint sont moirts.
31 — Si nos ns djudjéns nos-minmes, nos n' serèns nén djudjî.
32 — Totfeye pa ses djudjmints, li Signeur nos coridje po k' nos ni croûléxhe nén avou l' monde.
33 — Adon, mes frés, cwand vos vs rashonnez po mindjî, ratindoz-vs onk l' ôte.
34 — Si onk a fwin, k' i mindje a s' måjhone po nén vs rashonner ey assaetchî on djudjmint so vos. Dji réguelrè les ôtès afwaires cwand dji serè arivé.