II
1 Por mi, Fréres, quand dja stî addé voz, çi n’est nin en vl’lan yesse pu grand, pa li lingadje ou l’scyince qui dj iso v’nu voz annonçî li messadje dau Bon Diè.
2 Pasqui, dji n’a nin pinsé sawè aûte tchôse addé voz, sauf Djésus, è Djésus mwart dissus one crwè.
3 Mi minme, dj'èste addé voz one miete flauwe è djave peu ;
4 mi lingadje è mes prétches ni ripwasinne nin su des preuves di scyince, min po mostrer l’Esprit è l’fwace…
5 po qui vosse fwè ni seuye nin bâtie su l’scyince des hommes, min su l’fwace dau Bon Diè.
6 Portant, c’esse-t-one scyince qui nos préchans addé les djins comifaut, scyince qui n’est nin d’asteûre, nis des maîsses d’asteûre, qui sèront raminés à rin.
7 Nos préchans li scyince dau Bon Diè, catchîe, qui l’Bon Diè ave tûsé divan asteûre, po nosse glwère.
8 I gna nuk des maîsses d’asteûre qui l’a c’nochu, pasqui si il l’avinne c’nochu, i n’aurinne nin foutu l’Seigneûr di glwère su on crwè.
9 Mins, c’est comme il est scrî :
« Su qui l’ouye n’a nin veyu,
Su qui l’oreille n’a nin ètindu,
E su qui n’est nin monté dins l’coeûr da l’homme,
Tot c’qui l’Bon Diè a apprèté po les çi qui l’aimaient bin. »
10 A noz aûtes, li Bon Diè l’a fait sawè pa l’Esprit. Pasqui l’Esprit fougne dins tot, minme dins les profondeus dau Bon Diè.
11 Qui, dins les hommes, sé bin su qui rwaite l’homme, sauf l’Esprit da l’homme qui est d’dins ? Comme ça, persoûne ni sé su qui rwaite li Bon Diè, sauf l’Esprit dau Bon Diè.
12 Et no-z-aûtes, no n’avans nin riçû l’Esprit dè monde, mins li çi dau Bon Diè po sèpe çu qui li Bon Diè nos a dinné pa s’grâce.
13 Et no-z-è causans, nin avou des mots del scyince des hommes, mins avou les çi da l’Esprit, en espliquant les vérités da l’Esprit à des hommes d’Esprit.
14 Mins l’homme ni r’çï nin les affères dau Bon Diè, pasqui elles sont des biestryies por li è i n’ pou nin les connoche pousqui c’esse-t avou l’Esprit qu’on juje.
15 L’homme d’Esprit, li, juje di tot è i n’est jujî pa persoûne.
16 Ben ayi : « Qui a cnochu li pinsée dau Bon Diè po l’espliquer ? » Et no-z-aûtes, nos avans li pinsée da Christ.