D'abitude si wespiant et sins fwace audjoûrdu,
Dins si p'tit lé tot blanc, l'èfant est là stindu.
Come elles sont div'neuwes pâles, ses ros'lantès massales !
Ses brès et ses bodènes sont sètches come des astales.
Li, qui fiait si voltîye tofère li p'tit calén,
I n'a minme pus l'coradje d'ossî s'tiesse sus l'cossén
Quand s'moman s'clénce sur li et lî fait ène èguègne,
Po sayî qu'sus ses lèpes, gn'eûche in sorîre qui r'vègne.
Ses grands oûys qui riyénn't, qu'esténn't si amitieûs,
Sont co pus grands asteûre. Mins come is sont pitieûs !
On dîréve qu'il advine ci qu'nos n'vlans nén co vôye.
Mon Dieu ! Nosse pitit-andje nos va-t-i dîre ârvôye ?
Nos faurait-i ddja mète nosse cœûr dizos ène crwès ?
Si nos plénnes prinde li p'tit ène miète dissus nos brès !
I nos chène à t'les deux qu'po l'aûrder et l'disfinde
Nos l'y sèrr'én-nes si fwârt qu'on nos n'èl sâréve prinde.
Mins non. Pusqui l'docteûr nos disfind del boudjî,
A gn'gnos au pîd do lé, i n'nos d'meûre qu'à priyî.
Tènoz, là qu'i nos r'wéte, i s'faut raçtinu d'brére.
Dji vous lî fait risète, mins c'è n'n'est-ène amére.
Il a l'air di d'mander : « Poqwè n'-fiôz rén por mi ?
Vos qui m'wèt si voltîye, poqwè m'lèyîz soufri ? »
L'ombe s'aspèchit dins l'tchambe; li malade s'èsoctéye.
Prians, prians d'nosse mia, po qui l' Bon Diè nos l'léye.
Dins si p'tit lé tot blanc, l' èfant est là stindu.
Pôve Papa ! Pôve Moman ! oh come is sont stréndus.