Nos cœûrs ont stî lontimps stréndus,
Mins l'docteûr a dit audjoûrdu
En piçant li p'tit pa l'orèye;
« Tapéz è-vôye totes les botèyes.
Asteûre, qu'i s' lève quand i vôrè
Et dins yût djoûs, on m'è r'causerè ! »
Do côp, Moman ra s'guéye visadje
Et s'bon sorîre, èt tot s'coradje.
Fini dè l'vôye les ouys rimplis
Des lârmes qui n' v'lénn't jamais sètchi.
Papa, li, dins tote li maujone,
Fait in disdû, ah! i s'è done !
I danse, i tchante, est-ce qu'i d'vént foû ?
On lî cause vatche, i rèspond boû !
I gripe les montéyes quate à quate,
En criyant: « I n'est pus malade !
Abîye, abîye, mi p'tit colau,
A nos deux, nos djoûwerans au t'chfau,
Aux mayes, al briche, al bale, aux guîyes ;
Nos djiperans, nos f'rans des séndjerîyes ;
Abîye, abîye, mi p'tit bèdo,
Hop, les couvèrtes ! Rilèvez vos!»
Et l'èfant, tot fwèbe su ses djambes,
Raprind ses prèmîs pas dins l'tchambe,
Eture si moman èt s' papa.
Li vîye est bèle ces momints là !
Tote ène Vîye (CW1940)/XVIII
18
Tote ène Vîye, Les Cahiers Wallons lº 32,
Bouneûr
Note Wikisourd
On powinme avou l' minme tite, do minme sicrijheu (Bouneûr) est diferin d' ci-ci.