Nos avéns pierdou noste evoyeuse di noveles del Boliveye, Djåclene Michaux, e 2009 (Rantoele l° 50). Nos avéns rtrové kékes racsegnes dilé Augustin Kreit (Rantoele 96)…
Mins, come prometou, vola on corwaitaedje direk pa ene politolodjisse do payis, ki Flipe Boula a stî e hant avou leye, å rcweri des eredjistrumints del fåve « Li Bijhe et l’ Solea » låvå. Ele corwaite les vôtaedjes do 18 d’ octôbe 2020 (prumî toû po rlomer on prezidint). Rilomer, di dju.
Èn an dvant
Foice ki, èn an dvant, li 20 d’ octôbe 2019, gn aveut ddja yeu des eleccions. Li prezidint Evo Morales, k’ esteut ddja la dispu 14 ans, aveut co arivé prumî. Portant, ci n’ esteut nén foirt dins les regues, ca gn aveut yeu on referandom, li 21 di fevrî 2016 po vey s’ i s’ pleut rprezinter on troejhinme côp mågré çou k’ est scrît divins li mwaisse lwè (constitucion). Eyet c’ esteut li « nonna ! » k’ aveut wangnî.
Avou ça ki : si victwere di 2019 aveut stî forbatowe. Il aveut stî ametou d’ frawtinaedje, çou k’ esteut målåjhey a prover, ca ses afronteus avént bouté l’ feu a puzieurs buros d’ vôte.
Rizultat des coûsses : do bardouxha, l’ årmêye ki s’ è mele, et å difinmint d’ conte, nost Evo ki doet taper l’ cote sol håye, eyet cwiter l’ payis, po wårder vete pea [avoir la vie sauve]. I fourit ascoyî e Mecsike, pu bagua eviè l' Årdjintene.
Mins si pårti, li MAS (Mouvmint Aviè l’ Socialisse) ‒ a hintche sol tchantî politike ‒ vike co. Nén foirt camaerådes avou l’ govienmint ki s’ a-st astalé (di foice). Ci-ci est moenné pal prezidinte Jeanine Añez. C’ est des djins del droete wårdiveuse.
Eter deus vôtaedjes
Li govienmint d’ tranzicion aveut come mwaisse bouye di mete so pî des novelès eleccions.
Portant, i s’ a cdû come on vraiy govienmint, tot si rsaetchant di l’ ALBA et d’ l’ UNASUR.
L’ ALBA (Alianza Bolivariana para América), c’ est ene organizåcion economike des payis d’ hintche di l’ Amerike latene, moennêye på Venezwela. L’ UNASUR (Unión de Naciones Suramericanas), c’ esteut tos les payis d’ Amerike nonnrece å cmince, mins il ont cwité a flouxhe di 2018 a 2020, tantea ki, pol djoû d’ ouy, al fén, gn a pus kel Venezwela et Surinam (åresse, li neyerlandès î est onk des lingaedjes oficirs).
Li Jeanine a-st eto scoté les rlåcions diplomatikes avou sacwants payis, Couba et l’ Venezwela, dji wadje.
Po lûter disconte çou k’ i lomént l’ « terorisse » ‒ metans : les rotaedjes des djins po dmander k’ on rvôtaxhe ‒ l’ årmêye a polou djouwer do fizik disconte les « bardouxheus ».
Les novelès eleccions ki dvént trevni dins les troes moes, ont stî rastårdjeyes sacwants côps. Po cmincî po rmete d’ adrame li Tribunå Dizeutrin po ls Eleccions (Tribunal Supremo Electoral). Adonpwis, di cåze del parminêye ki s’ a spårdou pattavå e bontins 2020.
Rotaedjes po k’ on rvôte
Å cmince do moes d’ awousse 2020, après cwate di ces rastårdjaedjes la, les djins end ont yeu leu sô. Li pårti MAS a volou adjinçner des påjhûles rotaedjes. Il a stî racsût pa toplin des soces di payizans, di djins do payis (indyins) et d’ ovrîs. Cesses-ciales ont-st ataké a bårer les voyes et a fé des nouzomes metingues dins tot l’ payis des Hôts tienes (å Coûtchant, e l’ Coidlire des Andes).
Ça fwait ki, voye non voye, il a bén falou clawer ene date po rvôter. Li k'-esteut prezidinte, Jeanine Añez, s’ a pår divou rsaetchî evoye come candidate, a cåze di herlemes, dandjreus a vey avou do profitaedje di s’ fonccion.
Rizultats
Tote li gåtche (aloyance l’alliance MAS-IPSP) s’ aveut ratroplé åtoû d’ on lomé Luis Arce. L’ ome obtina 55,1 åcint des vwès do prumî côp. C’ esteut on rzultat co pus hôt k’ el ci da Evo Morales e 2019. Tchance avou : ses eterlûteus do Mitan (Carlos Mesa) et di droete (Luis Fernando Camacho) lyi dnît l’ tchapurnêye, ricnoxhant li valixheur des vôtaedjes.
Po dire li veur, c’ esteut ene victwere do MAS, mins eto on rfuzaedje do raecisse disconte les Indyins. C’ esteut des milices ki tijhnént les cmeres ki poirtént les cotrês ås falbalas (pollera).
.jpg)
Scota sociå
Portant, ezès « Bassès Teres », li payis industriyel metou åtoû d’ Santa Cruz de la Sierra, il ont vôté nouzommint a droete. Sabaye si cisse fraiteure sociåle la si ratchitchrè ene miete dins les vôtaedjes a vni.
Dins l' eplaidaedje so papî, sacwants målåjheys mots sont ratournés e francès.