[ 56 ]

ELL’GOUTTE EIÉT L’ARAGNE.

(La Goutte et l’Araignée.)

Quand l’bon Diœu a ieu fai, lés Gouttes eièt l’Aragne,
Pou d’esgousté et taurturé lés geins,
I leû dit : « Faut choési, pou d’meuré dain vôs r’coins,
« L’mogeonne dé l’ville, ou l’cahiutte dè l’campagne ?
« Ainsi woétèt d’choési vo bin !
« Si vo v’lét tiré à l’busquette,
« L’affaire s’ra bin rade fette. »

[ 57 ]

— L’Aragne dit : « dés cahiuttes, i n’min faut né pou rin !
— Mai coéyant iesse pu fine, ell’Goutte,
Dédain l’mogeonne, voéyant toudi l’méd’cin,
Avét n’droque ou d’longuant, n’sérinque ou in papin,
Choési l’cahiutte, eiét l’va s’foûtte,
Sû l’ôrtia d’in soyeu !
— In d’sant, c’est mi qu’a cheû d’su l’nœu !
Nia pont d’med’cin droci pou v’ni plaqué s’n’inplâte !
Pont d’méd’cin pou l’paufe qu’est malade !
— V’la l’Aragne dain l’mogeonne, elle s’aclappe au planchî,
Elle fai n’toèle au zoézeaux ! pou rattinte elle sachî,
Enne mouche vint s’faî printe comme enne sotte !
Tout d’allét bin ! v’la qu’elle prin n’motte,
In cousin, n’wespe èt in picron ;
Mai v’la l’mesquenne qui vint, broucheter avét s’ramon !
A r’voére ess’fricassée eiét s’toèle quai si tenne !
Elle dé r’fai ieune in s’foutant dé l’mesquenne !
Mai v’la d’quoé s’foute ell’tiesse au mûr :
Tout à l’piquette du joû, ell’vint avét sés brouches,
Eiét co pou c’coup ci, il a ploû d’sû lés mouches !
S’ramon estèt n’miette trop dûr !
L’Aragne vint trouvé l’Goutte et li d’minde : qué nouvelles ?
— Taiche tu ! j’su bin cint coups, pu mau moènnèe qué ti !
« I m’moènne finte dés cûs d’arbe, dain l’bot ou au courti,
« Et soyi des ch’firons, ou dés clappes dé cuvelles !
Eièt j’d’ai ieune à mes côrdelles !
— Cangeons, distelle l’Aragne, et rade chez in chafti,
Elle s’aclappe ousqué l’brouche, n’avét p’tette jamai sti !
A l’fin lé v’la à s’nauche !
Et l’Goutte s’éva binauche,
Chaire su lés dognons d’in curèt,
Qué s’mesquenne ell’sognet, comme in effant wastét,
Elle li fiét dés papins, elle li stichét s’barette !
Et drolà l’Goutte a sti, dôrlottée à l’doyette.

[ 58 ]
MORALE :

Ça vo mousse qu’on n’doét né toudi s’jugi trop haut,
Q’tout costèt, qui qué c’fuche, doét woéti d’ténî s’plasse,
Nimpôrte ess’position, s’raing, s’fortune ou bin s’classe ;
Si tout l’monde fiét ainsi, ça n’dirét né pu mau.